സാമ്പത്തിക സര്‍വേ റിപ്പോര്‍ട്ട് ഇന്ന്‌

ന്യൂഡല്‍ഹി:  2025-26 ലെ കേന്ദ്ര ബജറ്റ് ഫെബ്രുവരി ഒന്നിന് പാര്‍ലമെന്റില്‍ അവതരിപ്പിക്കും. അതിനു മുന്‍പ് ഇന്ന്‌ സാമ്പത്തിക സര്‍വേ റിപ്പോര്‍ട്ട് അവതരിപ്പിക്കും. ബജറ്റിന് ഒരു ദിവസം പാര്‍ലമെന്റില്‍ ബജറ്റ് സമ്മേളനം ആരംഭിക്കും. അതായത് നാളെ രാവിലെ 11 മണിക്ക് ബജറ്റ് സമ്മേളനം തുടങ്ങും.  സംയുക്ത സമ്മേളനത്തില്‍ രാഷ്ട്രപതി ഇരുസഭകളെയും അഭിസംബോധന ചെയ്യും. ശേഷം, കേന്ദ്ര ധനമന്ത്രി നിര്‍മ്മല സീതാരാമന്‍  2023 സാമ്പത്തിക വര്‍ഷത്തേക്കുള്ള സാമ്പത്തിക വളര്‍ച്ചയെക്കുറിച്ചുള്ള പ്രവചനങ്ങളുമായി പ്രീ-ബജറ്റ് സാമ്പത്തിക സര്‍വേ അവതരിപ്പിക്കും.  

കഴിഞ്ഞ സാമ്പത്തിക സര്‍വേ അവതരിപ്പിച്ച് ആറ് മാസത്തിന് ശേഷമാണ് ഈ വര്‍ഷം വീണ്ടും സാമ്പത്തിക സര്‍വേ അവതരിപ്പിക്കുന്നത്. കാരണം, 2024 ഇന്ത്യയില്‍ തിരഞ്ഞെടുപ്പ് വര്‍ഷമായിരുന്നു, അതിനാല്‍ 2024ലെ തിരഞ്ഞെടുപ്പിന് ശേഷം ജൂലൈയിലാണ് സമ്പൂര്‍ണ ബജറ്റ് അവതരിപ്പിച്ചത്.

കഴിഞ്ഞ വര്‍ഷത്തെ സാമ്പത്തിക വിഷയങ്ങള്‍ സാമ്പത്തിക സര്‍വേ അവലോകനം ചെയ്യുന്നു. കൂടാതെ കാര്‍ഷിക, വ്യാവസായിക ഉല്‍പ്പാദനം, അടിസ്ഥാന സൗകര്യങ്ങള്‍, തൊഴില്‍, പണപ്പെരുപ്പ നിരക്ക്, വ്യാപാരം, വിദേശനാണ്യ കരുതല്‍ ശേഖരം, മറ്റ് സാമ്പത്തിക മേഖലകള്‍ എന്നിവയിലെ പ്രവണതകള്‍ സര്‍വേ വിശകലനം ചെയ്യുന്നു. ഈ വിശദമായ സര്‍വേ, കേന്ദ്ര ബജറ്റില്‍ കൂടുതല്‍ കാര്യക്ഷമമായി തീരുമാനങ്ങള്‍ എടുക്കാന്‍  ഗവണ്‍മെന്റിനെ സഹായിക്കുന്നു. രാജ്യത്തിന്റെ ജിഡിപി വളര്‍ച്ചയുടെ പ്രധാന വെല്ലുവിളികള്‍ തിരിച്ചറിയാനും സാമ്പത്തിക സര്‍വേ സഹായിക്കുന്നു. 

കഴിഞ്ഞ കുറച്ച് വര്‍ഷങ്ങളായി, സാമ്പത്തിക സര്‍വേ 'പാര്‍ട്ട് എ', 'പാര്‍ട്ട് ബി' എന്നീ രണ്ട് ഭാഗങ്ങളായാണ് അവതരിപ്പിച്ചിരിക്കുന്നത്, അതില്‍ രാജ്യത്തിന്റെ ജിഡിപി വളര്‍ച്ചാ വീക്ഷണം, പണപ്പെരുപ്പ നിരക്ക്, പ്രവചനങ്ങള്‍, ഫോറെക്‌സ് കരുതല്‍ ശേഖരം, വ്യാപാര കമ്മി എന്നിവയെക്കുറിച്ചുള്ള വിവരങ്ങള്‍ ഉള്‍പ്പെടുന്നു. അതേസമയം, പാര്‍ട്ട്  ബി  സാമൂഹിക സുരക്ഷ, ദാരിദ്ര്യം, വിദ്യാഭ്യാസം, ആരോഗ്യ സംരക്ഷണം, മനുഷ്യവികസനം തുടങ്ങിയ പ്രത്യേക വിഷയങ്ങളെക്കുറിച്ചുള്ള വിശദാംശങ്ങള്‍ നല്‍കുന്നു. സര്‍ക്കാര്‍ നടത്തുന്ന പ്രധാന പദ്ധതികളും പ്രധാന നയങ്ങളും അവയുടെ ഫലങ്ങളും സര്‍വേ വിശദമാക്കുന്നു.