വയനാടിന് കേന്ദ്രം 898 കോടി രൂപ നല്‍കിയെന്ന് അമിത് ഷാ

ന്യൂഡല്‍ഹി:  വയനാട്ടിലെ ദുരന്തസമയത്ത് കേരളത്തിലേക്ക് ആവശ്യമായ സഹായം കേന്ദ്രം നല്‍കിയെന്ന് അമിത് ഷാ. പല ഘട്ടങ്ങളിലായി കേന്ദ്രം സംസ്ഥാനത്തിന് നല്‍കിയ സാമ്പത്തിക സഹായത്തിന്റെ കണക്ക് അവതരിപ്പിച്ചാണ് മന്ത്രിയുടെ പ്രതികരണം. ദേശീയ ദുരന്ത നിവാരണ ബില്ലിലെ ചര്‍ച്ചക്കിടെ പാര്‍ലമെന്റിലാണ് അദ്ദേഹത്തിന്റെ പ്രതികരണം.

'ഇതില്‍ രാഷ്ട്രീയമില്ല. കേരളത്തിലെ ജനങ്ങളും ലഡാക്കിലെ ജനങ്ങളും ഇന്ത്യക്കാരാണ്. ഈ സര്‍ക്കാരിന് ദുരന്തമുഖത്ത് രാഷ്ട്രീയം കാട്ടേണ്ട ആവശ്യമില്ല. വയനാട് ദുരന്ത സമയത്ത് എന്‍ഡിആര്‍എഫില്‍ നിന്ന് 215 കോടി രൂപ അനുവദിച്ചു. വയനാട്ടിലേത് അതി തീവ്ര ദുരന്തമെന്ന് പ്രഖ്യാപിച്ചു. 

മന്ത്രി തല സമിതിയുടെ റിപ്പോര്‍ട്ടിന്റെ അടിസ്ഥാനത്തില്‍ 153 കോടി രൂപ കൂടി നല്‍കി. 2219 കോടി രൂപയുടെ പുനരധിവാസ പാക്കേജ് സംസ്ഥാനം ആവശ്യപ്പെട്ടിട്ടുണ്ട്. ഇതില്‍ 530 കോടി രൂപ നല്‍കി.' തുടര്‍ സഹായം മാനദണ്ഡങ്ങള്‍ക്കനുസരിച്ച് നല്‍കുമെന്നും കേന്ദ്രമന്ത്രി പറഞ്ഞു.