യുബറിൽ അധിക നിരക്ക് ഈടാക്കുന്നു : കയ്യോടെ പിടികൂടി,കേന്ദ്ര മന്ത്രി പ്രഹ്ലാദ് ജോഷി

വേഗത്തിലുള്ള സേവനത്തിനായി മുൻകൂർ ടിപ്പുകൾ നൽകാൻ ഉപയോക്താക്കളെ പ്രേരിപ്പിച്ചതിന് ഇന്ത്യാ ഗവൺമെന്റിന്റെ സെൻട്രൽ കൺസ്യൂമർ പ്രൊട്ടക്ഷൻ അതോറിറ്റി (സിസിപിഎ) ക്യാബ് അഗ്രഗേറ്റർ കമ്പനിയായ ഉബറിന് നോട്ടീസ് നൽകി. കമ്പനിയുടെ 'അഡ്വാൻസ്‍ഡ് ടിപ്പ്' സിസ്റ്റം കാരണമാണ് ഈ നോട്ടീസ് അയച്ചിരിക്കുന്നത്. എത്രയും വേഗം റൈഡ് കൺഫർമേഷനും പിക്കപ്പും ലഭിക്കുന്നതിന് ഉപയോക്താക്കളെ അധിക തുക നൽകാൻ നിർബന്ധിക്കുന്നതിനാണ് കമ്പനി ഈ ടിപ്പ് സിസ്റ്റം ഉപയോഗിക്കുന്നത്. കേന്ദ്ര ഉപഭോക്തൃകാര്യ മന്ത്രി പ്രഹ്ലാദ് ജോഷി ഇത്തരം സംവിധാനങ്ങളിലും രീതികളിലും ഗുരുതരമായ ആശങ്ക പ്രകടിപ്പിക്കുകയും അവയെ അധാർമ്മികം എന്നും ചൂഷണം എന്നും അന്യായമായ വ്യാപാരത്തിന്റെ ഒരു രൂപം എന്നും വിശേഷിപ്പിച്ചു.

സേവനം നൽകിയതിനുശേഷം സ്വമേധയാ നൽകുന്ന അഭിനന്ദന പ്രകടനമായിരിക്കണം ടിപ്പ് നൽകുന്നതെന്നും മുൻകൂട്ടി ആവശ്യപ്പെടുന്ന ഒരു അവകാശമല്ലെന്നും കേന്ദ്രമന്ത്രി വ്യക്തമാക്കി. അദ്ദേഹം തന്റെ ആശങ്കകൾ പ്രകടിപ്പിച്ചതിന് പിന്നാലെ ഉബറിന്റെ പെരുമാറ്റത്തെക്കുറിച്ച് അന്വേഷിക്കാൻ ഉപഭോക്തൃ കാര്യ മന്ത്രാലയത്തിന് കീഴിൽ പ്രവർത്തിക്കുന്ന സിസിപിഎയോട് അദ്ദേഹം നിർദ്ദേശിച്ചു. ഉപഭോക്താക്കളുമായി ഇടപഴകുമ്പോൾ നീതി, സുതാര്യത, ഉത്തരവാദിത്തം എന്നിവ നിലനിർത്തണമെന്ന് മന്ത്രി ഊന്നിപ്പറഞ്ഞു. 

ഉബർ ആപ്പിൽ ഒരു ക്യാബ് ബുക്ക് ചെയ്യുമ്പോൾ, ബുക്കിംഗ് വേഗത്തിൽ സ്ഥിരീകരിക്കുന്നതിനും നേരത്തെയുള്ള പിക്കപ്പിനും ഉപയോക്താക്കളോട് 5 രൂപ, 75 രൂപ അല്ലെങ്കിൽ 100 രൂപ ടിപ്പ് നൽകണമെന്ന് ആവശ്യപ്പെടുന്നു. നിങ്ങൾ ഒരു ടിപ്പ് ചേർത്താൽ, ഡ്രൈവർ യാത്ര സ്വീകരിക്കാൻ കൂടുതൽ സാധ്യതയുണ്ട് എന്ന് ആപ്പിലെ സന്ദേശം പറയുന്നു. ഡ്രൈവർമാർക്ക് ടിപ്പിന്റെ 100 ശതമാനം ലഭിക്കുമെന്നും എന്നാൽ അത് ചേർത്തതിന് ശേഷം ഉപയോക്താക്കൾക്ക് തുക മാറ്റാൻ കഴിയില്ലെന്നും അതിൽ പറയുന്നു.

വേഗതയേറിയ സേവനത്തിനായി ഉപയോക്താക്കളെ മുൻകൂറായി ടിപ്പ് നൽകാൻ നിർബന്ധിക്കുകയോ പ്രേരിപ്പിക്കുകയോ ചെയ്യുന്നത് അധാർമ്മികവും ചൂഷണപരവുമാണെന്നും അത്തരം നടപടികൾ അന്യായമായ വ്യാപാര രീതികളുടെ കീഴിൽ വരുമെന്നും സോഷ്യൽ മീഡിയ പോസ്റ്റിൽ മന്ത്രി പ്രഹ്ളാദ് ജോഷി വ്യക്തമാക്കി. സിസിപിഎ ഇക്കാര്യത്തിൽ ഉബറിന് നോട്ടീസ് നൽകിയെന്നും പ്ലാറ്റ്‌ഫോമിൽ നിന്ന് വിശദീകരണം തേടിയെന്നും മന്ത്രി അദ്ദേഹം പോസ്റ്റ് ചെയ്തു. എല്ലാ ഉപഭോക്തൃ ഇടപെടലുകളിലും നീതി, സുതാര്യത, ഉത്തരവാദിത്തം എന്നിവ ഉയർത്തിപ്പിടിക്കണമെന്നും ജോഷി കൂട്ടിച്ചേർത്തു.

അതേസമയം ഇത് ആദ്യമായല്ല സിസിപിഎ ഉബറിനെതിരെ നോട്ടീസ് അയയ്ക്കുന്നത്. ഉപയോക്താക്കളുടെ മൊബൈൽ ഓപ്പറേറ്റിംഗ് സിസ്റ്റത്തെ (ആൻഡ്രോയിഡ് അല്ലെങ്കിൽ ഐഒഎസ്) അടിസ്ഥാനമാക്കി വ്യത്യസ്ത നിരക്കുകൾ ഈടാക്കിയതിന് ജനുവരി ആദ്യം അതോറിറ്റി ഉബറിനും ഒലയ്ക്കും നോട്ടീസ് അയച്ചിരുന്നു. ഇന്ത്യയിലെ റൈഡ്-ഹെയ്‌ലിംഗ് പ്ലാറ്റ്‌ഫോമുകൾ നിരന്തരമായ നിരീക്ഷണത്തിലാണെന്ന് പുതിയ അറിയിപ്പ് കാണിക്കുന്നു.