ബിജെപിയുടെ വരുമാനത്തിലും തിരഞ്ഞെടുപ്പ് ചെലവുകളിലും വന്‍ വര്‍ധനവെന്ന് ഓഡിറ്റ് റിപ്പോര്‍ട്ട്

ന്യൂഡല്‍ഹി: ഇന്ത്യന്‍ രാഷ്ട്രീയത്തിലെ സാമ്പത്തിക ശക്തിയായി ഭാരതീയ ജനതാ പാര്‍ട്ടി (ബിജെപി) തങ്ങളുടെ ആധിപത്യം തുടരുന്നു. തിരഞ്ഞെടുപ്പ് കമ്മീഷന് സമര്‍പ്പിച്ച ഏറ്റവും പുതിയ ഓഡിറ്റ് റിപ്പോര്‍ട്ടിലാണ് ബിജെപിയുടെ വരുമാനത്തിലും തിരഞ്ഞെടുപ്പ് പ്രചാരണങ്ങള്‍ക്കായി ചെലവഴിക്കുന്ന തുകയിലും ഉണ്ടായ വന്‍ വര്‍ധനവിന്റെ കണക്കുകള്‍ പുറത്തുവന്നിരിക്കുന്നത്.

18-ാം ലോക്സഭയിലേക്കും എട്ട് സംസ്ഥാന നിയമസഭകളിലേക്കും തിരഞ്ഞെടുപ്പ് നടന്ന 2024-25 സാമ്പത്തിക വര്‍ഷത്തില്‍, ബിജെപി തിരഞ്ഞെടുപ്പ് പ്രചാരണങ്ങള്‍ക്കും പൊതുപ്രചാരണങ്ങള്‍ക്കുമായി ചെലവഴിച്ചത് 3,335.36 കോടി രൂപയാണ്. തിരഞ്ഞെടുപ്പ് കമ്മീഷന് സമര്‍പ്പിച്ച പാര്‍ട്ടിയുടെ വാര്‍ഷിക ഓഡിറ്റ് റിപ്പോര്‍ട്ടിലാണ് ഈ വിവരങ്ങളുള്ളത്. 17-ാം ലോക്സഭയിലേക്കും ഏഴ് നിയമസഭകളിലേക്കും തിരഞ്ഞെടുപ്പ് നടന്ന 2019-20 കാലയളവില്‍ ചെലവഴിച്ച 1,352.92 കോടി രൂപയുടെ ഏകദേശം രണ്ടര മടങ്ങാണ് ഈ തുക.

2024 മാര്‍ച്ച് 16-നാണ് തിരഞ്ഞെടുപ്പ് കമ്മീഷന്‍ വോട്ടെടുപ്പ് പ്രഖ്യാപിച്ചത്. അതിനാല്‍ പ്രചാരണ പ്രവര്‍ത്തനങ്ങള്‍ 2023-24 സാമ്പത്തിക വര്‍ഷത്തില്‍ തന്നെ ആരംഭിച്ചിരുന്നു. ഏപ്രില്‍ 19 മുതല്‍ ജൂണ്‍ 1 വരെ 44 ദിവസങ്ങളിലായാണ് വോട്ടെടുപ്പ് നടന്നത്. തിരഞ്ഞെടുപ്പിന് തൊട്ടുമുമ്പുള്ള വര്‍ഷമായ 2023-24-ല്‍ തിരഞ്ഞെടുപ്പ് പ്രചാരണങ്ങള്‍ക്കും മറ്റുമായി 1,754.06 കോടി രൂപയാണ് പാര്‍ട്ടി ചെലവഴിച്ചത്.

അതനുസരിച്ച്, 18-ാം ലോക്സഭയിലേക്കും എട്ട് നിയമസഭകളിലേക്കും നടന്ന തിരഞ്ഞെടുപ്പിന് മുന്നോടിയായുള്ള രണ്ട് വര്‍ഷത്തെ (തിരഞ്ഞെടുപ്പ് വര്‍ഷവും അതിന് തൊട്ടുമുമ്പുള്ള വര്‍ഷവും) മൊത്തം ചെലവ് 5,089.42 കോടി രൂപയാണ്. ഇത് 17-ാം ലോക്സഭയിലേക്കും ഏഴ് നിയമസഭകളിലേക്കും നടന്ന തിരഞ്ഞെടുപ്പിന് മുന്നോടിയായുള്ള രണ്ട് വര്‍ഷത്തെ ആകെ ചെലവായ 2,145.31 കോടി രൂപയുടെ ഇരട്ടിയിലധികമാണ്.

മഹാരാഷ്ട്ര, ഹരിയാന, ജാര്‍ഖണ്ഡ്, ഒഡീഷ, സിക്കിം, അരുണാചല്‍ പ്രദേശ്, ആന്ധ്രാപ്രദേശ് എന്നീ സംസ്ഥാനങ്ങളിലായിരുന്നു 2019-20, 2024-25 വര്‍ഷങ്ങളിലെ നിയമസഭാ തിരഞ്ഞെടുപ്പുകള്‍ നടന്നത്. 2024-25ല്‍ ഈ ഏഴ് സംസ്ഥാനങ്ങള്‍ക്ക് പുറമെ ജമ്മു കശ്മീരിലും വോട്ടെടുപ്പ് നടന്നു.

2025 ഡിസംബര്‍ 27-ന് ബിജെപി തിരഞ്ഞെടുപ്പ് കമ്മീഷന് സമര്‍പ്പിക്കുകയും ഈ ആഴ്ച കമ്മീഷന്‍ പ്രസിദ്ധീകരിക്കുകയും ചെയ്ത വാര്‍ഷിക റിപ്പോര്‍ട്ട് പ്രകാരം, പാര്‍ട്ടിയുടെ ആകെ ചെലവിന്റെ (3,774.58 കോടി രൂപ) 88 ശതമാനവും തിരഞ്ഞെടുപ്പ് ചെലവുകളാണ്. തിരഞ്ഞെടുപ്പ്/പൊതു പ്രചരണത്തിനായുള്ള ആകെ ചെലവില്‍ 68 ശതമാനവും (2,257.05 കോടി രൂപ) പരസ്യങ്ങള്‍ക്കും പ്രചരണങ്ങള്‍ക്കുമായാണ് വിനിയോഗിച്ചത്. ഇതില്‍ ഇലക്ട്രോണിക് മീഡിയ വഴിയുള്ള പ്രചരണത്തിനായിരുന്നു ഏറ്റവും ഉയര്‍ന്ന ചെലവ് (1,124.96 കോടി രൂപ). 

പരസ്യങ്ങള്‍ക്കായി 897.42 കോടി രൂപയും ചെലവഴിച്ചു. വിമാനങ്ങള്‍ക്കും ഹെലികോപ്റ്ററുകള്‍ക്കുമായി പാര്‍ട്ടി 583.08 കോടി രൂപ ചെലവഴിച്ചതായും റിപ്പോര്‍ട്ടില്‍ പറയുന്നു. സ്ഥാനാര്‍ത്ഥികള്‍ക്കുള്ള സാമ്പത്തിക സഹായമായി 312.90 കോടി രൂപയാണ് പാര്‍ട്ടി നല്‍കിയത്. കഴിഞ്ഞ ലോക്സഭാ തിരഞ്ഞെടുപ്പ് കാലയളവില്‍ ബിജെപിയുടെ തിരഞ്ഞെടുപ്പ് ചെലവ് 2018-2019-ല്‍ 792.39 കോടി രൂപയായിരുന്നത് 2019-2020-ല്‍ 1,352.92 കോടി രൂപയായി വര്‍ദ്ധിച്ചു.

മറുഭാഗത്ത്, കോണ്‍ഗ്രസ് കഴിഞ്ഞ വര്‍ഷം തിരഞ്ഞെടുപ്പ് കമ്മീഷന് സമര്‍പ്പിച്ച വാര്‍ഷിക റിപ്പോര്‍ട്ട് പ്രകാരം, തിരഞ്ഞെടുപ്പ് പ്രചാരണങ്ങള്‍ക്കായി 2023-2024-ല്‍ 619.67 കോടി രൂപ ചെലവാക്കിയിരുന്നത് 2024-2025-ല്‍ 896.22 കോടി രൂപയായി ഉയര്‍ന്നു.

ബിജെപിയുടെ ആകെ വരുമാനം 2023-2024-ലെ 4,340.47 കോടി രൂപയില്‍ നിന്ന് 2024-2025-ല്‍ 6,769.14 കോടി രൂപയായി വളര്‍ന്നെന്നും റിപ്പോര്‍ട്ട് വ്യക്തമാക്കുന്നു. പാര്‍ട്ടിയുടെ വരുമാനത്തിന്റെ ഭൂരിഭാഗവും സന്നദ്ധ സംഭാവനകളിലൂടെയാണ് (6,124.85 കോടി രൂപ) ലഭിച്ചത്. ബാക്കി തുക ഫീസുകള്‍, സബ്സ്‌ക്രിപ്ഷനുകള്‍, ബാങ്ക് പലിശ, മറ്റ് സ്രോതസ്സുകള്‍ എന്നിവയില്‍ നിന്നാണ്.

ഇലക്ടറല്‍ ബോണ്ട് സ്‌കീം സുപ്രീം കോടതി റദ്ദാക്കിയ ശേഷമുള്ള ആദ്യ വര്‍ഷമായിരുന്നു 2024-2025 എങ്കിലും, ബിജെപിയിലേക്കുള്ള സംഭാവനകള്‍ മുന്‍വര്‍ഷത്തെ 3,967.14 കോടി രൂപയില്‍ നിന്ന് 54 ശതമാനം വര്‍ധിച്ചു. ഡിസംബറില്‍ തിരഞ്ഞെടുപ്പ് കമ്മീഷന്‍ പ്രസിദ്ധീകരിച്ച ബിജെപിയുടെ കോണ്‍ട്രിബ്യൂഷന്‍ റിപ്പോര്‍ട്ട് പ്രകാരം, 2024-2025-ല്‍ പാര്‍ട്ടിക്ക് ലഭിച്ച ആകെ സംഭാവനകളുടെ 61 ശതമാനവും ഇലക്ടറല്‍ ട്രസ്റ്റുകളില്‍ നിന്നാണ്.

2025 മാര്‍ച്ച് 31-ന് അവസാനിച്ച കണക്കുകള്‍ പ്രകാരം 12,164.14 കോടി രൂപയുടെ ക്ലോസിങ് ബാലന്‍സോടെയാണ് പാര്‍ട്ടി ആ വര്‍ഷം പൂര്‍ത്തിയാക്കിയത്. മുന്‍വര്‍ഷം 7,113.90 കോടി രൂപയായിരുന്ന കൈവശമുള്ള പണവും നിക്ഷേപങ്ങളും വര്‍ഷാവസാനമായപ്പോഴേക്കും 9,996.12 കോടി രൂപയായി ഉയര്‍ന്നുവെന്നും റിപ്പോര്‍ട്ട് കാണിക്കുന്നു.

തിരഞ്ഞെടുപ്പ് കമ്മീഷന്‍ ചട്ടങ്ങള്‍ അനുസരിച്ച്, എല്ലാ രാഷ്ട്രീയ പാര്‍ട്ടികളും അവരുടെ വാര്‍ഷിക ഓഡിറ്റ് റിപ്പോര്‍ട്ടുകളും 20,000 രൂപയ്ക്ക് മുകളിലുള്ള എല്ലാ സംഭാവനകളും ഉള്‍ക്കൊള്ളുന്ന കോണ്‍ട്രിബ്യൂഷന്‍ റിപ്പോര്‍ട്ടുകളും സമര്‍പ്പിക്കേണ്ടതുണ്ട്. ഈ റിപ്പോര്‍ട്ടുകള്‍ പിന്നീട് തിരഞ്ഞെടുപ്പ് കമ്മീഷന്‍ അവരുടെ വെബ്‌സൈറ്റിലൂടെ പരസ്യപ്പെടുത്തും.