ഓര്‍മ്മ ശക്തിക്കുള്ള ഗിന്നസ് ലോക റെക്കോര്‍ഡ് സ്വന്തമാക്കി കേരളത്തിന്റെ ഐക്യുമാന്‍ അജി ആര്‍.

കൊല്ലം: കേരളത്തിന്റെ ഐക്യു മാന്‍ എന്നറിയപ്പെടുന്ന കൊല്ലം,കുണ്ടറ സ്വദേശി അജി ആറിന് ഓര്‍മ്മ ശക്തിക്കുള്ള ഗിന്നസ് ലോക റെക്കോര്‍ഡ്. വെറും നാല് നിമിഷം കൊണ്ട് ഏറ്റവും നീളമുള്ള നമ്പര്‍ ശ്രേണി ഓര്‍ത്തെടുത്തു പറഞ്ഞാണ് അജി റെക്കോര്‍ഡ് നേട്ടം കൈവരിച്ചത്. 

നാല് നിമിഷം കൊണ്ട് സ്‌ക്രീനില്‍ ഉണ്ടായിരുന്ന 48 നമ്പറുകള്‍ ആണ് അജി ഓര്‍ത്തു പറഞ്ഞത്. ഒരു മനുഷ്യന് അസാധ്യം എന്ന് കരുതിയിരുന്ന കാര്യമാണ് ഇതിലൂടെ അജി ലോകത്തിനു മുന്നില്‍ കാണിച്ചു തന്നത്. വിദേശത്തുള്ള കുട്ടികളുമായി സംവദിക്കുവാനും തന്റെ കഴിവുകളെ അവര്‍ക്ക് പകര്‍ന്നു നല്‍കുവാനുമായി പുറപ്പെട്ട ഒരു വിമാനയാത്രക്കിടയില്‍ ആണ് തനിക്കു ഗിന്നസ് റെക്കോര്‍ഡ് ലഭിച്ച ഔദ്യോഗിക വിവരം അജി അറിഞ്ഞത്. 

ക്യാപ്റ്റനും, ക്യാബിന്‍ ക്രൂ അംഗങ്ങളും സഹ യാത്രികരും ചേര്‍ന്ന് ആകാശത്തു വെച്ചാണ് ആദ്യ ആദരവ് നല്‍കിയത്. ഷാര്‍ജയില്‍ നടന്ന പുസ്തകോത്സവത്തില്‍ വെച്ച് അറേബ്യന്‍ ബുക്ക് ഓഫ് റെക്കോര്‍ഡ് അജി ഏറ്റു വാങ്ങിയിരുന്നു. ഇരട്ടി മധുരം ആയാണ് അതിനൊപ്പം ഗിന്നസ് ലോക റെക്കോര്‍ഡും അജിയിലേക്ക് എത്തിച്ചേര്‍ന്നത്.