ലോകകപ്പ് നേടിയിട്ടെന്ന 'വാക്ക്' തെറ്റിച്ചു! അഫ്​ഗാൻ  സൂപ്പർ സ്പിന്നർ റാഷിദ് ഖാൻ വിവാഹിതനായി

കാബുൾ: അഫ്​ഗാനിസ്ഥാൻ സൂപ്പർ സ്പിന്നർ റാഷിദ് ഖാൻ വിവാഹിതനായി. അഫ്​ഗാനിസ്ഥാൻ ലോകകപ്പ് നേടിയ ശേഷമേ വിവാഹമുള്ളു എന്നേ 4 വർഷം മുമ്പ് പറഞ്ഞ വാക്ക് തെറ്റിച്ചാണ് താരത്തിന്റെ വിവാഹം. ഇന്നലെയാണ് വിവാഹം നടന്നത്. അഫ്​ഗാൻ ടീമിലെ റാഷിദിന്റെ സഹ താരങ്ങൾ ഉൾപ്പെടെയുള്ളവർ വിവാഹ വിരുന്നിൽ പങ്കെടുത്തു. വിവാഹ വസ്ത്രം ധരിച്ചു നിൽക്കുന്ന റാഷിദിന്റെ ചിത്രങ്ങളും സഹ താരങ്ങൾക്കൊപ്പമുള്ള ഫോട്ടോകളും സാമൂഹിക മാധ്യമങ്ങളിൽ പ്രചരിക്കുന്നുണ്ട്.

അഫ്​ഗാൻ തലസ്ഥാനമായ കാബുളിലാണ് റാഷിദിന്റെ വിവാഹച്ചടങ്ങുകൾ നടന്നത്. താരത്തിനൊപ്പം മൂന്ന് സഹോദരങ്ങളും ഒരേ വേദിയിൽ തന്നെ വിവാഹിതരായി. ആമിർ ഖലീൽ, സക്കീയുള്ള, റാസ ഖാൻ എന്നിവരാണ് റാഷിദിനൊപ്പം വിവാഹിതരായ സഹോദരങ്ങൾ. പഷ്തൂൺ ആചരമനുസരിച്ചായിരുന്നു ചടങ്ങുകൾ.

മുൻപ് ആസാ​ദി റേഡിയോയ്ക്ക് നൽകിയ അഭിമുഖത്തിലാണ് താരം അഫ്​ഗാൻ ലോകകപ്പ് നേടിയ ശേഷം മാത്രമേ വിവാഹം കഴിക്കുവെന്നു പ്രഖ്യാപിച്ചത്. അഫ്​ഗാൻ പക്ഷേ ലോകകപ്പ് നേടിയില്ല. എന്നാൽ ഏത് കൊല കൊമ്പൻ ടീമിനേയും വീഴ്ത്താൻ പോന്ന കരുത്തുമായാണ് അവർ നിലവിൽ കളിക്കുന്നത്. അതിൽ റാഷിദിന് നിർണായക പങ്കുമുണ്ട്.