ആന്റണിക്കായി അല്‍ നസര്‍ ബിഡ് സമര്‍പ്പിച്ചു

മാഞ്ചസ്റ്റര്‍: സൗദി പ്രോ ലീഗ് ക്ലബ്ബായ അല്‍-നസ്ര്‍, മാഞ്ചസ്റ്റര്‍ യുണൈറ്റഡിന്റെ ബ്രസീലിയന്‍ വിങ്ങര്‍ ആന്റണിയെ സ്വന്തമാക്കാന്‍ ഔദ്യോഗികമായി ബിഡ് സമര്‍പ്പിച്ചു. മൂന്ന് വര്‍ഷം മുമ്പ് 95 ദശലക്ഷം യൂറോയ്ക്ക് അയാക്‌സില്‍ നിന്ന് മാഞ്ചസ്റ്റര്‍ യുണൈറ്റഡില്‍ എത്തിയ ആന്റണിക്ക് യുണൈറ്റഡില്‍ ഫോം കണ്ടെത്താന്‍ ആയിരുന്നില്ല.

മാഞ്ചസ്റ്റര്‍ യുണൈറ്റഡിനായി രണ്ടര സീസണുകളിലായി 12 ഗോളുകളും അഞ്ച് അസിസ്റ്റുകളും മാത്രമാണ് ആന്റണി നേടിയത്. കഴിഞ്ഞ സീസണിന്റെ രണ്ടാം പകുതിയില്‍ താരം റയല്‍ ബെറ്റിസില്‍ ലോണില്‍ കളിച്ചിരുന്നു. അവിടെ 26 മത്സരങ്ങളില്‍ നിന്ന് ഒമ്പത് ഗോളുകളും അഞ്ച് അസിസ്റ്റുകളുമായി മികച്ച പ്രകടനം കാഴ്ചവെക്കാന്‍ ആന്റണിക്ക് സാധിച്ചു. ഈ ലോണ്‍ പ്രകടനം താരത്തിന് പുതിയ ഉണര്‍വ് നല്‍കുകയും പുതിയ ക്ലബ്ബുകളുടെ താല്‍പ്പര്യം ആകര്‍ഷിക്കുകയും ചെയ്തു.

ക്രിസ്റ്റ്യാനോ റൊണാള്‍ഡോ, സാദിയോ മാനെ, ജാവോ ഫെലിക്‌സ് തുടങ്ങിയ സൂപ്പര്‍ താരങ്ങളുള്ള അല്‍-നസ്ര്‍ ആന്റണിയെ കൂടെ സ്വന്തമാക്കി സൗദി ലീഗ് കിരീടം സ്വന്തമാക്കാന്‍ ശ്രമിക്കുകയാണ്. 2027 വരെ മാഞ്ചസ്റ്റര്‍ യുണൈറ്റഡുമായി കരാറുള്ള ആന്റണിക്ക് വേണ്ടി സ്പാനിഷ് ക്ലബുകളും രംഗത്ത് ഉണ്ട്.