സഞ്ജുവും സഹോദരനും ഇനി ഒരുമിച്ചു കളിക്കും

തിരുവനന്തപുരം: ഇന്ത്യന്‍ ക്രിക്കറ്റ് താരം സഞ്ജു സാംസണും സഹോദരന്‍ സാലി സാംസണും കേരള ക്രിക്കറ്റ് ലീഗില്‍ ഒരുമിച്ചു കളിക്കും. കെസിഎല്‍ താരലേലത്തില്‍ സാലി സാംസണെ അടിസ്ഥാന വിലയായ 75,000 രൂപയ്ക്ക് കൊച്ചി ബ്ലൂ ടൈഗേഴ്‌സ് വാങ്ങി. കഴിഞ്ഞ സീസണിലും കൊച്ചി ബ്ലൂ ടൈഗേഴ്‌സിന്റെ താരമായിരുന്നു സാലി സാംസണ്‍. സഞ്ജു കെസിഎലിന്റെ ആദ്യ സീസണില്‍ കളിച്ചിരുന്നില്ല.

ഓള്‍ റൗണ്ടറായ സാലി പ്ലേയര്‍ ഡ്രാഫ്റ്റില്‍ സി കാറ്റഗറിയിലാണ് ഉള്‍പ്പെട്ടിരുന്നത്. സാലിയുടെ പേരു വിളിച്ചപ്പോള്‍, അവതാരകനായ ചാരു ശര്‍മയോട് സഞ്ജു സാംസണിന്റെ സഹോദരനാണെന്നു വേദിയില്‍നിന്ന് വിളിച്ചുപറയുന്നുണ്ടായിരുന്നു. തൊട്ടുപിന്നാലെ മുന്‍ താരത്തില്‍ താല്‍പര്യം അറിയിച്ച് കൊച്ചി തന്നെ വീണ്ടും രംഗത്തെത്തി. താരത്തിനു വേണ്ടി മറ്റു ടീമുകളൊന്നും മുന്നോട്ടുവരാതിരുന്നതോടെ അടിസ്ഥാന വിലയ്ക്കു സാലി സാംസണ്‍ വിറ്റുപോയി.

ഓള്‍റൗണ്ടറായ താരം അണ്ടര്‍ 16 വിഭാഗത്തില്‍ സൗത്ത് സോണിനു വേണ്ടി കളിച്ചിട്ടുണ്ട്. കേരളത്തിന്റെ അണ്ടര്‍ 23, 25 ടീമുകളിലും അംഗമായിരുന്നു. 34 വയസ്സുകാരനായ സാലി ലിസ്റ്റ് എയില്‍ ആറു മത്സരങ്ങളില്‍ കളിക്കാനിറങ്ങി. 26.80 ലക്ഷം രൂപയ്ക്കാണ് കൊച്ചി സഞ്ജുവിനെ സ്വന്തമാക്കിയത്. മൂന്നു ലക്ഷം രൂപയായിരുന്നു താരത്തിന്റെ അടിസ്ഥാന വില.

സഞ്ജുവിനെ വാങ്ങാന്‍ തുടക്കം മുതല്‍ കൊച്ചി ശ്രമം തുടങ്ങിയിരുന്നു. തൃശൂര്‍ ടൈറ്റന്‍സും ട്രിവാന്‍ഡ്രം റോയല്‍സും താരത്തിനായി മത്സരിച്ചതോടെ വില അതിവേഗം കൂടി. ഒടുവില്‍ 26.80 ലക്ഷമെന്ന റെക്കോര്‍ഡ് തുകയ്ക്ക് കൊച്ചി ബ്ലൂ ടൈഗേഴ്‌സ് സഞ്ജുവിനെ സ്വന്തമാക്കുകയായിരുന്നു.