സത്വിക്-ചിരാഗ് സഖ്യം ഹോങ്കോങ് ഓപ്പണ്‍ സെമിയില്‍

ഹോങ്കോങ്: ഇന്ത്യയുടെ സ്റ്റാര്‍ ബാഡ്മിന്റണ്‍ പുരുഷ ഡബിള്‍സ് ജോഡികളായ സാത്വിക് സായ്രാജ് രങ്കിറെഡ്ഡി-ചിരാഗ് ഷെട്ടി സഖ്യം ഹോങ്കോങ് ഓപ്പണ്‍ ബാഡ്മിന്റണ്‍ ടൂര്‍ണമെന്റിന്റെ സെമി ഫൈനലില്‍ പ്രവേശിച്ചു. 

ക്വാര്‍ട്ടര്‍ ഫൈനലില്‍ മലേഷ്യയുടെ ജുനൈദി ആരിഫ്-റോയ് കിംഗ് യാപ് സഖ്യത്തെ ഒരു മണിക്കൂറിലധികം നീണ്ട പോരാട്ടത്തിനൊടുവില്‍ മൂന്ന് സെറ്റുകള്‍ക്ക് പരാജയപ്പെടുത്തിയാണ് ഇന്ത്യന്‍ താരങ്ങളുടെ മുന്നേറ്റം. സ്‌കോര്‍: 21-14, 20-22, 21-16.

എട്ടാം സീഡായ ഇന്ത്യന്‍ ജോഡിക്ക് ആധികാരികമായ പ്രകടനം പുറത്തെടുക്കാന്‍ സാധിച്ചെങ്കിലും വിജയം അനായാസമായിരുന്നില്ല. സാത്വിക് മുന്നില്‍ നിന്ന് നയിച്ചപ്പോള്‍, സര്‍വീസുകളിലും ചില കോര്‍ട്ട് ജഡ്ജ്‌മെന്റുകളിലും ചിരാഗ് പതറുന്നത് കാണാമായിരുന്നു.

നേരത്തെ പ്രീ-ക്വാര്‍ട്ടറില്‍ തായ്ലന്‍ഡിന്റെ പീരച്ചായ് സുക്ഫുന്‍-പക്കോണ്‍ തീരരത്സകുല്‍ സഖ്യത്തെ ഒരു ഗെയിമിന് പിന്നില്‍ നിന്ന ശേഷം 18-21, 21-15, 21-11 എന്ന സ്‌കോറിന് തോല്‍പ്പിച്ചാണ് സാത്വിക്-ചിരാഗ് സഖ്യം ക്വാര്‍ട്ടറിലെത്തിയത്.