നാലാം ടെസ്റ്റില്‍ ഇംഗ്ലണ്ടിന് പടുകൂറ്റന്‍ സ്‌കോര്‍

ഓള്‍ഡ് ട്രാഫോര്‍ഡ്:  ഓള്‍ഡ് ട്രാഫോര്‍ഡില്‍ നടക്കുന്ന നാലാം ടെസ്റ്റില്‍ ഇന്ത്യയെ 311 റണ്‍സിന് പിന്നിലാക്കി ഇംഗ്ലണ്ട് തങ്ങളുടെ ഒന്നാം ഇന്നിംഗ്‌സില്‍ 669 റണ്‍സിന്റെ കൂറ്റന്‍ സ്‌കോര്‍ നേടി ആധിപത്യം ഉറപ്പിച്ചു.
ഓപ്പണര്‍മാരായ സാക്ക് ക്രോളിയും ബെന്‍ ഡക്കറ്റും ചേര്‍ന്ന് സൃഷ്ടിച്ച 166 റണ്‍സിന്റെ തകര്‍പ്പന്‍ കൂട്ടുകെട്ട് ഇംഗ്ലണ്ടിന് മികച്ച തുടക്കം നല്‍കിയിരുന്നു. ക്രോളി 84 റണ്‍സും ഡക്കറ്റ് 94 റണ്‍സും നേടി. ഓലി പോപ്പ് 71 റണ്‍സ് സംഭാവന ചെയ്തപ്പോള്‍, ജോ റൂട്ടും ക്യാപ്റ്റന്‍ ബെന്‍ സ്റ്റോക്‌സും പൂര്‍ണ്ണ നിയന്ത്രണം ഏറ്റെടുത്തു. റൂട്ട് 248 പന്തില്‍ 150 റണ്‍സെടുത്ത് നിലയുറപ്പിച്ചപ്പോള്‍, സ്റ്റോക്‌സ് ഇന്ന് ആക്രമിച്ച് കളിച്ച് 198 പന്തില്‍ മൂന്ന് സിക്‌സറുകളടക്കം 141 റണ്‍സ് നേടി.

ഇംഗ്ലണ്ടിന്റെ മധ്യനിരയും വാലറ്റവും നിര്‍ണ്ണായക റണ്‍സ് നേടി. ബ്രൈഡണ്‍ കാര്‍സ് അതിവേഗം 47 റണ്‍സ് കൂട്ടിച്ചേര്‍ത്ത് ഇന്ത്യന്‍ ബൗളര്‍മാരെ കൂടുതല്‍ നിരാശരാക്കി. രവീന്ദ്ര ജഡേജ നാല് വിക്കറ്റും വാഷിംഗ്ടണ്‍ സുന്ദര്‍ രണ്ട് വിക്കറ്റും വീഴ്ത്തി ഇന്ത്യന്‍ ബൗളിംഗില്‍ ചെറുത്ത് നില്‍പ്പ് നടത്തി. ജസ്പ്രീത് ബുംറ രണ്ട് വിക്കറ്റ് വീഴ്ത്തിയെങ്കിലും 33 ഓവറില്‍ 112 റണ്‍സ് വഴങ്ങി വളരെ അധികം റണ്‍സ് വിട്ടുകൊടുത്തു.