ഇന്ത്യന്‍ ഫുട്‌ബോള്‍ ടീം സി .എ .എഫ് .എ  നേഷന്‍സ് കപ്പില്‍ കളിക്കും

ന്യൂഡല്‍ഹി: AFC ഏഷ്യന്‍ കപ്പ് 2027 യോഗ്യതാ മത്സരങ്ങള്‍ക്കുള്ള ഒരുക്കങ്ങളുടെ ഭാഗമായി ഇന്ത്യന്‍ പുരുഷ ഫുട്‌ബോള്‍ ടീം CAFA നേഷന്‍സ് കപ്പ് 2025-ല്‍ മാറ്റുരയ്ക്കും. ഉസ്‌ബെക്കിസ്ഥാനും താജിക്കിസ്ഥാനും സംയുക്തമായി ആതിഥേയത്വം വഹിക്കുന്ന ഈ ടൂര്‍ണമെന്റ് ഓഗസ്റ്റ് 31 മുതല്‍ സെപ്റ്റംബര്‍ 8 വരെ നടക്കും.

ഇന്ത്യയെ ഗ്രൂപ്പ് ബി-യില്‍ ആതിഥേയരായ താജിക്കിസ്ഥാന്‍, നിലവിലെ ചാമ്പ്യന്മാരായ ഇറാന്‍, അഫ്ഗാനിസ്ഥാന്‍ എന്നിവര്‍ക്കൊപ്പമാണ് ഉള്‍പ്പെടുത്തിയിരിക്കുന്നത്.ദുഷാന്‍ബെയില്‍ ഓഗസ്റ്റ് 29-ന് താജിക്കിസ്ഥാനെതിരെയാണ് ബ്ലൂ ടൈഗേഴ്‌സിന്റെ ആദ്യ മത്സരം. തുടര്‍ന്ന് സെപ്റ്റംബര്‍ 1-ന് ഇറാനെയും സെപ്റ്റംബര്‍ 4-ന് അഫ്ഗാനിസ്ഥാനെയും നേരിടും.

ഓരോ ഗ്രൂപ്പില്‍ നിന്നും ആദ്യ രണ്ട് സ്ഥാനക്കാര്‍ പ്ലേ-ഓഫിലേക്ക് മുന്നേറും. ഫൈനല്‍ സെപ്റ്റംബര്‍ 8-ന് താഷ്‌കന്റില്‍ നടക്കും. ഉസ്‌ബെക്കിസ്ഥാനില്‍ നടക്കുന്ന ഗ്രൂപ്പ് എ-യില്‍ ആതിഥേയര്‍ക്കൊപ്പം കിര്‍ഗിസ് റിപ്പബ്ലിക്, തുര്‍ക്ക്‌മെനിസ്ഥാന്‍, ഒമാന്‍ എന്നിവര്‍ ഉള്‍പ്പെടുന്നു. ഈ വര്‍ഷത്തെ ടൂര്‍ണമെന്റിലേക്ക് ക്ഷണിക്കപ്പെട്ട രണ്ട് ടീമുകളാണ് ഇന്ത്യയും ഒമാനും. 2023 ഫൈനലില്‍ ഉസ്‌ബെക്കിസ്ഥാനെ 1-0 ന് തോല്‍പ്പിച്ച് ഇറാന്‍ നിലവിലെ ചാമ്പ്യന്മാരായി ടൂര്‍ണമെന്റില്‍ എത്തുന്നു.