കെ സി എല്‍ രണ്ടാം സീസണില്‍ മിന്നും പ്രകടനം കാഴ്ച്ചവെക്കാന്‍ മലപ്പുറത്തിന്റെ ആറ് താരങ്ങള്‍

മലപ്പുറം: ഓഗസ്റ്റ് 21 മുതല്‍ ആരംഭിക്കുന്ന കെസിഎല്‍ ക്രിക്കറ്റ് പൂരത്തിന് മലപ്പുറത്തിന്റെ ആറു താരങ്ങളാണ് വിവിധ ടീമുകള്‍ക്കായി കളത്തിലിറങ്ങുക. ഐപിഎല്ലില്‍ മികച്ച പ്രകടനം കാഴ്ച്ച വെച്ച വിഗ്‌നേഷ് പുത്തൂര്‍ ഇത്തവണയും ആലപ്പി റിപ്പിള്‍സിന് വേണ്ടി കളിക്കുമ്പോള്‍
കെ.എം.ആസിഫും നിഖില്‍ തോട്ടത്തിലും കൊച്ചി ബ്ലൂ ടൈഗേഴ്‌സിന് വേണ്ടിയാകും ഗ്രൗണ്ടിലിറങ്ങുക. ആനന്ദ് കൃഷ്ണന്‍,സിബിന്‍ ഗിരീഷ്, മുഹമ്മദ് ഇസ്ഹാഖ് എന്നിവര്‍ തൃശൂര്‍ ടൈറ്റന്‍സിന് വേണ്ടി കളിക്കും. ഈ സീസണില്‍ ഏവരും ഉറ്റുനോക്കുന്ന ശ്രദ്ധേയമായ താരങ്ങളുടെ പട്ടികയിലാണ് വിഗ്‌നേഷിന്റെ സ്ഥാനം. ഐപിഎല്‍ കഴിഞ്ഞ സീസണില്‍ മുബൈ ഇന്ത്യന്‍സിനായി ബൌള്‍ ചെയ്ത താരമാണ് വിഘ്‌നേഷ് പുത്തൂര്‍. നിര്‍ണ്ണായക സന്ദര്‍ഭങ്ങളില്‍ റണ്ണൊഴുക്ക് തടയുന്നതിനും വിക്കറ്റ് നേടുന്നതിനും മിടുക്കുള്ള താരമാണ് ഇദ്ദേഹം. 3.75 ലക്ഷം രൂപയ്ക്കാണ് ആലപ്പി റിപ്പിള്‍സ് ഈ 24 കാരനെ ടീമില്‍ നിലനിര്‍ത്തിയത്.

കെ.എം. ആസിഫിനെ 3.20 ലക്ഷം രൂപയ്ക്കാണ് കൊച്ചി ബ്ലൂ ടൈഗേഴ്‌സ് ടീമിലെത്തിച്ചത്. മീഡിയം പേസ് ബൗളറായ ആസിഫ് കഴിഞ്ഞ സീസണില്‍ ഏരീസ് കൊല്ലം സെയിലേഴ്സിന് വേണ്ടി 12 വിക്കറ്റുകള്‍ വീഴ്ത്തിയിരുന്നു. വിക്കറ്റ് കീപ്പര്‍ നിഖില്‍ തോട്ടത്തിലിനെ കൊച്ചി ബ്ലൂ ടൈഗേഴ്‌സ് 2.10 ലക്ഷം രൂപയ്ക്കാണ് സ്വന്തമാക്കിയത്.

ട്വന്റി-20 ക്രിക്കറ്റില്‍ കേരളത്തില്‍ നിന്നു തന്നെ മികച്ച സ്‌ട്രൈക്ക് റേറ്റുള്ള താരമാണ് ആനന്ദ് കൃഷ്ണന്‍. 7 ലക്ഷം രൂപയ്ക്കാണ് തൃശൂര്‍ ടൈറ്റന്‍സ് ആനന്ദ് കൃഷ്ണനെ ടീമിനൊപ്പം ചേര്‍ത്തത്.ആദ്യ സീസണില്‍ തൃശൂര്‍ ടൈറ്റന്‍സിനായി മികച്ച ബൗളിംഗ് പുറത്തെടുത്ത മുഹമ്മദ് ഇസ്ഹാഖിനെ 1.50 ലക്ഷം രൂപയ്ക്ക് ലേലത്തിലൂടെ തൃശൂര്‍ ടൈറ്റന്‍സ് നിലനിര്‍ത്തുകയായിരുന്നു . പോയ സീസണില്‍ 9 മത്സരങ്ങള്‍ കളിച്ച മുഹമ്മദ് ഇസ്ഹാഖ് 11 വിക്കറ്റുകളാണ് പേരിലാക്കിയത്.

അതേ സമയം മികച്ച ഓള്‍ റൗണ്ടര്‍ കൂടിയായ സിബിന്‍ ഗിരീഷ് നിര്‍ണ്ണായക സമയത്ത് വിക്കറ്റെടുക്കാനും കഴിവുള്ള താരമാണ്.1.50 ലക്ഷം രൂപയ്ക്കാണ് സിബിന്‍ ഗിരീഷിനെ തൃശൂര്‍ ടൈറ്റന്‍സ് അണിയിലെത്തിച്ചത്.കഴിഞ്ഞ സീസണില്‍ കൊച്ചി ബ്ലൂടൈഗേഴ്‌സ് താരമായിരുന്ന നിഖില്‍ തോട്ടത്തില്‍ നിര്‍ണ്ണായ സന്ദര്‍ഭങ്ങളില്‍ ടീമിനായി മികച്ച പ്രകടനം നടത്താന്‍ കഴിവുള്ള താരമാണ്. ആദ്യ സീസണിലെ മിന്നും ബാറ്റിംഗ് പ്രകടനമാണ് നിഖില്‍ തോട്ടത്തിലിനെ 2.10 ലക്ഷം രൂപയ്ക്ക് ടീമിലെത്തിക്കാന്‍ കൊച്ചി ബ്ലൂ ടൈഗേഴ്‌സിന് പ്രേരണയായത്.