കെസിഎലില്‍ ടോപ് സ്‌കോറര്‍ 'റോയല്‍സ്' ക്യാപ്റ്റന്‍

തിരുവനന്തപുരം: കെസിഎല്‍ രണ്ടാം സീസണിലെ പ്രാഥമിക റൗണ്ട് മത്സരങ്ങള്‍ ഇന്ന് അവസാനിക്കാനിരിക്കെ, ക്രിക്കറ്റ് വെടിക്കെട്ടിന്റെ പൂരപ്പറമ്പായി മാറിയിരിക്കുകയാണ് കാര്യവട്ടം സ്‌പോര്‍ട്‌സ് ഹബ് സ്റ്റേഡിയം. ലീഗില്‍ 28 മത്സരങ്ങള്‍ കഴിഞ്ഞപ്പോള്‍ പിറന്നത് 3 സെഞ്ചറികളും 45 അര്‍ധ സെഞ്ചറികളും. 9 തവണയാണ് ടീം സ്‌കോര്‍ 200 കടന്നത്.

ലീഗിലെ വലിയ താരത്തിളക്കമായ രാജ്യാന്തര താരം സഞ്ജു സാംസണ്‍ കെസിഎല്‍ അരങ്ങേറ്റം ഉജ്വലമാക്കിയാണ് ഏഷ്യ കപ്പില്‍ ഇന്ത്യക്കായി കളിക്കാന്‍ ദുബായിലേക്കു പോയത്. 5 ഇന്നിങ്‌സുകളില്‍ ഒരു സെഞ്ചറിയും 3 അര്‍ധ സെഞ്ചറിയും അടക്കം സഞ്ജു നേടിയത് 368 റണ്‍സ്. സീസണിലെ ഇതുവരെയുള്ള ഉയര്‍ന്ന വ്യക്തിഗത സ്‌കോറും (121) സഞ്ജുവിന്റെ പേരിലാണ്.

അവസാന 2 കളികളിലെ തകര്‍പ്പന്‍ ബാറ്റിങ്ങുമായി ട്രിവാന്‍ഡ്രം റോയല്‍സ് നായകന്‍ കൃഷ്ണപ്രസാദാണ് റണ്‍ വേട്ടക്കാരില്‍ മുന്നില്‍; 479 റണ്‍സ്. തൃശൂര്‍ ടൈറ്റന്‍സിന്റെ കൗമാരതാരം അഹമ്മദ് ഇമ്രാന്‍ (423) രണ്ടാം സ്ഥാനത്ത്. സീസണില്‍ സഞ്ജുവിനെക്കൂടാതെ സെഞ്ചറി നേടിയതും കൃഷ്ണപ്രസാദും ഇമ്രാനും മാത്രം. മൂവര്‍ക്കും 3 അര്‍ധ സെഞ്ചറികളുമുണ്ട്. തൊണ്ണൂറുകളിലെത്തിയ ശേഷം തലനാരിഴയ്ക്കു സെഞ്ചറി നഷ്ടപ്പെട്ടത് 5 പേര്‍ക്കാണ്; അഹമ്മദ് ഇമ്രാന്‍ (98), രോഹന്‍ കുന്നുമ്മല്‍ (94), വിഷ്ണു വിനോദ് (94), സച്ചിന്‍ ബേബി (91), കൃഷ്ണ പ്രസാദ് (90).