മനോലോ മാര്‍ക്കസ് ഇന്ത്യന്‍ ഫുട്‌ബോള്‍ ടീം പരിശീലക സ്ഥാനം ഒഴിഞ്ഞു

 മുംബൈ: ഇന്ത്യന്‍ ദേശീയ ഫുട്‌ബോള്‍ ടീം പരിശീലകന്‍ മനോലോ മാര്‍ക്വെസുമായി പരസ്പര ധാരണയോടെ വഴിപിരിയാന്‍ ഓള്‍ ഇന്ത്യ ഫുട്‌ബോള്‍ ഫെഡറേഷന്‍ (എ.ഐ.എഫ്.എഫ്) തീരുമാനിച്ചു. ഇന്ന് ചേര്‍ന്ന എ.ഐ.എഫ്.എഫ് എക്‌സിക്യൂട്ടീവ് കമ്മിറ്റി യോഗം ഈ തീരുമാനത്തിന് അംഗീകാരം നല്‍കി. ഇതോടെ, പുതിയ ദേശീയ ടീം പരിശീലകനെ കണ്ടെത്താന്‍ ഫെഡറേഷന്‍ ഉടന്‍ പരസ്യം നല്‍കും.

മാര്‍ക്വെസിന്റെ കീഴില്‍ ടീമിന്റെ പ്രകടനം പ്രതീക്ഷിച്ച നിലവാരത്തിലേക്ക് ഉയരാത്തത് ഈ വേര്‍പിരിയലിന് കാരണമായെന്നാണ് വിലയിരുത്തപ്പെടുന്നത്.

ഇന്ത്യന്‍ ഫുട്‌ബോളിന്റെ ഭാവി കാര്യപരിപാടികള്‍, യുവജന വികസനം, ലീഗ് ഘടനയിലെ പരിഷ്‌കാരങ്ങള്‍ തുടങ്ങിയ വിഷയങ്ങള്‍ക്കൊപ്പം പരിശീലക മാറ്റവും എക്‌സിക്യൂട്ടീവ് കമ്മിറ്റി യോഗത്തില്‍ പ്രധാന ചര്‍ച്ചാ വിഷയമായിരുന്നു. പുതിയ പരിശീലകനെ തിരഞ്ഞെടുക്കുന്നതിലൂടെ ടീമിന് ഒരു പുതിയ ദിശാബോധം നല്‍കാനാണ് എ.ഐ.എഫ്.എഫ് ലക്ഷ്യമിടുന്നത്.

പുതിയ പരിശീലകനെ തേടിയുള്ള എ.ഐ.എഫ്.എഫിന്റെ നീക്കം ഇന്ത്യന്‍ ഫുട്‌ബോളിന്റെ അടുത്ത ഘട്ടത്തിന് ഒരു പുതിയ തുടക്കമാകുമെന്നാണ് പ്രതീക്ഷിക്കുന്നത്.