പരിക്കേറ്റിട്ടും മിന്നും പ്രകടനവുമായി ജോക്കോ

ന്യൂയോര്‍ക്ക്: ചരിത്രത്തിലെ 25-ാമത്തെ ഗ്രാന്‍ഡ് സ്ലാം കിരീടം ലക്ഷ്യമിട്ട് യു.എസ്. ഓപ്പണില്‍ ഇറങ്ങിയ സെര്‍ബിയന്‍ ഇതിഹാസം നോവാക് ഡ്യോക്കോവിച്ചിന് ആദ്യ മത്സരത്തില്‍ത്തന്നെ കടുത്ത പോരാട്ടം. കാലിലെ വിരലിനേറ്റ പരിക്കിനെ അവഗണിച്ചുകൊണ്ട്, 19 വയസ്സുകാരനായ അമേരിക്കന്‍ താരം ലേണര്‍ ടിയനെ നേരിട്ടുള്ള സെറ്റുകള്‍ക്ക് (61, 76 (7/3), 62) ജോക്കോവിച് കീഴടക്കി.

ആദ്യ സെറ്റില്‍ ഡ്യോക്കോവിച്ചിന്റെ ആധിപത്യമായിരുന്നു കണ്ടത്. വെറും 20 മിനിറ്റുകൊണ്ട് ഡ്യോക്കോവിച്ച് സെറ്റ് സ്വന്തമാക്കി. എന്നാല്‍, രണ്ടാം സെറ്റില്‍ ലേണര്‍ ടിയന്‍ ശക്തമായി തിരിച്ചുവന്നു. ടൈ-ബ്രേക്കറിലേക്ക് നീങ്ങിയ സെറ്റ്, നിര്‍ണായക നിമിഷങ്ങളില്‍ പതറാതെ ഡ്യോക്കോവിച്ച് നേടി. തുടര്‍ന്ന്, കാലിലെ വിരലിലെ ബ്ലിസ്റ്ററിന് ചികിത്സ തേടിയ ശേഷം മൂന്നാം സെറ്റില്‍ ഡ്യോക്കോവിച്ച് വീണ്ടും തകര്‍പ്പന്‍ പ്രകടനം പുറത്തെടുത്ത് മത്സരം സ്വന്തമാക്കി. രണ്ടാം റൗണ്ടില്‍ അമേരിക്കന്‍ താരം സാക്കറി സ്വജ്ദയെയാണ് ജോക്കോവിച് നേരിടുക.