പാരാലിമ്പിക്‌സ്; ഷോട്ട്പുട്ടില്‍ ഇന്ത്യയ്ക്ക് വെങ്കല മെഡല്‍

പാരീസ് : വെള്ളിയാഴ്ച പാരാലിമ്പിക്സില്‍ പുരുഷന്മാരുടെ ഷോട്ട്പുട്ട് എഫ്57 ഇനത്തില്‍ വെങ്കല മെഡല്‍ നേടി ഇന്ത്യയുടെ ഹൊകാതോ ഹോട്ടോഷെ സെമ ചരിത്രം സൃഷ്ടിച്ചു. സെമയുടെ ഏറ്റവും മികച്ച ദൂരം 14.65 മീറ്റര്‍ ആയിരുന്നു, വ്യക്തിഗത മികച്ച നേട്ടം കൂടിയായി ഇത്. ഈ നേട്ടം നാഗാലാന്‍ഡില്‍ നിന്ന് ഇന്ത്യക്കായി പാരാലിമ്പിക്സില്‍ മെഡല്‍ നേടുന്ന ആദ്യ അത്ലറ്റായി സെമയെ മാറ്റി. 

15.96 മീറ്റര്‍ എറിഞ്ഞ ഇറാന്റെ യാസിന്‍ ഖോസ്രാവിക്ക് സ്വര്‍ണ്ണം നേടി. ബ്രസീലിന്റെ തിയാഗോ പൗളിനോ ഡോസ് സാന്റോസ് 15.06 മീറ്റര്‍ എറിഞ്ഞ് വെള്ളി മെഡല്‍ നേടി. ഇതേ ഇനത്തില്‍ ഇന്ത്യയുടെ സോമന്‍ റാണ 14.07 മീറ്ററിലെ മികച്ച ശ്രമവുമായി അഞ്ചാം സ്ഥാനത്തെത്തി. പാരാലിമ്പിക്സില്‍ ഇന്ത്യയുടെ അത്ലറ്റിക്സ് നേട്ടം ഇപ്പോള്‍ 15 മെഡലുകളായി നിലകൊള്ളുന്നു, മൊത്തം 27 മെഡലുകളുമായി (ആറ് സ്വര്‍ണം, ഒമ്പത് വെള്ളി, 12 വെങ്കലം) രാജ്യം മൊത്തത്തില്‍ 17-ാം സ്ഥാനത്തെത്തി.