ഗോള്‍കീപ്പര്‍ ലൂക്കാസ് ഷെവലിയറെ സ്വന്തമാക്കി പിഎസ്ജി

പാരീസ്: സെന്റ് ജെര്‍മെയ്ന്‍ 23-കാരനായ ഫ്രഞ്ച് ഗോള്‍കീപ്പര്‍ ലൂക്കാസ് ഷെവലിയറെ ലില്ലെയില്‍ നിന്ന് €40 ദശലക്ഷം യൂറോക്ക് സ്വന്തമാക്കി. ഫ്രാന്‍സ് ദേശീയ ടീമിന്റെ പല സ്‌ക്വാഡുകളിലും അംഗമായിരുന്നിട്ടും സീനിയര്‍ അരങ്ങേറ്റം കുറിക്കാത്ത ഷെവലിയര്‍ 2030 വരെ ക്ലബ്ബില്‍ തുടരാനുള്ള കരാറില്‍ ഒപ്പുവെച്ചു.

ഇത് സ്വപ്നസാക്ഷാത്കാരമാണെന്ന് യുവ ഗോള്‍കീപ്പര്‍ വിശേഷിപ്പിച്ചു. റയല്‍ മാഡ്രിഡിനെതിരെ 1-0 ന്റെ വിജയത്തിലും അത്ലറ്റിക്കോ മാഡ്രിഡിനെതിരെ എവേ മത്സരത്തില്‍ 3-1 ന്റെ വിജയത്തിലും നിര്‍ണായക പങ്ക് വഹിച്ചുകൊണ്ട് ലില്ലെയ്ക്കായി മികച്ച പ്രകടനം കാഴ്ചവെച്ചതിന് ശേഷമാണ് ഷെവലിയര്‍ പിഎസ്ജിയില്‍ എത്തുന്നത്.

ഇറ്റാലിയന്‍-ബ്രസീലിയന്‍ യുവതാരം റെനാറ്റോ മാരിന്‍ ഈ വേനല്‍ക്കാലത്ത് ക്ലബ്ബിലെത്തിയതിന് ശേഷം പിഎസ്ജിയിലെത്തുന്ന രണ്ടാമത്തെ ഗോള്‍കീപ്പറാണ് ഷെവലിയര്‍. ജിയാന്‍ലൂജി ഡൊണ്ണറുമ്മ, മത്വേയ് സഫോനോവ്, അര്‍നൗ ടെനാസ് എന്നിവര്‍ പിഎസ്ജിയില്‍ ഉണ്ടായിരുന്നിട്ടും, സ്‌പോര്‍ട്ടിംഗ് ഡയറക്ടര്‍ ലൂയിസ് കാമ്പോസ് ഷെവലിയര്‍ക്ക് ഒന്നാം നമ്പര്‍ ഗോള്‍കീപ്പറുടെ പദവി വാഗ്ദാനം ചെയ്തിട്ടുണ്ടെന്ന് അടുത്ത വൃത്തങ്ങള്‍ സൂചിപ്പിക്കുന്നു. ബുധനാഴ്ച ഇറ്റലിയിലെ ഉഡിനില്‍ നടക്കുന്ന യൂറോപ്യന്‍ സൂപ്പര്‍ കപ്പില്‍ ടോട്ടന്‍ഹാമിനെതിരെ ഷെവലിയര്‍ക്ക് അരങ്ങേറ്റം കുറിക്കാന്‍ സാധ്യതയുണ്ട്.