റാഷ്ഫോര്‍ഡ് മാഞ്ചസ്റ്റര്‍ യുണൈറ്റഡ് ട്രെയിനിങ് ഗ്രൗണ്ടില്‍ പരിശീലനം പുനരാരംഭിച്ചു

മാഞ്ചസ്റ്റര്‍: മാഞ്ചസ്റ്റര്‍  യുണൈറ്റഡ് വിടാന്‍ ഒരുങ്ങുന്നതിനാല്‍ പ്രീസീസണ് ചേരാന്‍ കൂടുതല്‍ സമയം അനുവദിച്ചിരുന്നിട്ടും, മാര്‍ക്കസ് റാഷ്ഫോര്‍ഡ്  കാരിങ്ടണില്‍ പരിശീലനത്തിനായി എത്തി. പുതിയ മാനേജര്‍ റൂബന്‍ അമോറിമിന്റെ പ്രധാന ഗ്രൂപ്പില്‍ ചേരാതെ വ്യക്തിഗത പരിശീലനത്തിലാണ് റാഷ്ഫോര്‍ഡ് ഏര്‍പ്പെട്ടത്.

റാഷ്ഫോര്‍ഡിനൊപ്പം ഗര്‍നാച്ചോ, ജേഡന്‍ സാഞ്ചോ, ആന്റണി, ടൈറല്‍ മലാസിയ എന്നിവര്‍ക്കും തങ്ങളുടെ ഭാവിയെക്കുറിച്ച് തീരുമാനമെടുക്കാന്‍ ക്ലബ്ബ് അധിക അവധി നല്‍കിയിരുന്നു. 2025-26 സീസണിലെ അമോറിമിന്റെ പദ്ധതികളില്‍ ഇവര്‍ ഉള്‍പ്പെടുന്നില്ലെന്നാണ് റിപ്പോര്‍ട്ടുകള്‍. എന്നിരുന്നാലും, റാഷ്ഫോര്‍ഡിന്റെ നേരത്തെയുള്ള മടങ്ങിവരവ്, പ്രൊഫഷണലായി തുടരാനും നിലവിലെ ആശയക്കുഴപ്പങ്ങള്‍ പരിഹരിക്കാനുമുള്ള ആഗ്രഹത്തെയാണ് സൂചിപ്പിക്കുന്നത്.

27 വയസ്സുകാരനായ റാഷ്ഫോര്‍ഡിന് തന്റെ ഐക്കണിക് നമ്പര്‍ 10 ജേഴ്‌സി നഷ്ടമായിയിരുന്നു . വോള്‍വ്സില്‍ നിന്ന് 62.5 മില്യണ്‍ പൗണ്ടിന് യുണൈറ്റഡ് സൈന്‍ ചെയ്ത മാതിയസ് കുഞ്ഞയ്ക്ക് ഈ ജേഴ്‌സി കൈമാറിയിട്ടുണ്ട്.
കഴിഞ്ഞ സീസണിന്റെ അവസാന പകുതി ആസ്റ്റണ്‍ വില്ലയില്‍ ലോണില്‍ കളിച്ച റാഷ്ഫോര്‍ഡ്, വിദേശ ക്ലബ്ബുകളിലേക്കുള്ള ലോണ്‍ അല്ലെങ്കില്‍ സ്വാപ്പ് ഡീലുകള്‍ക്ക് തയ്യാറാണെന്ന് പറയപ്പെടുന്നു. നിക്കോ വില്യംസിനായുള്ള ബാഴ്‌സലോണയുടെ നീക്കം പരാജയപ്പെട്ടതിനെ തുടര്‍ന്ന് അവര്‍ റാഷ്ഫോര്‍ഡില്‍ താല്‍പ്പര്യം പ്രകടിപ്പിച്ചിട്ടുണ്ട്. .