രഞ്ജി ട്രോഫി; കേരളം മഹാരാഷ്ട്ര ആദ്യമത്സരം ഇന്ന് കാര്യവട്ടത്ത്

തിരുവനന്തപുരം: രഞ്ജി ട്രോഫി പുതിയ സീസണിലെ ആദ്യ മത്സരത്തില്‍ കേരളം ഇന്ന് കളത്തില്‍. തിരുവനന്തപുരം ഗ്രീന്‍ഫീല്‍ഡ് സ്റ്റേഡിയത്തില്‍ നടക്കുന്ന മത്സരത്തില്‍ മഹാരാഷ്ട്രയാണ് എതിരാളികള്‍. ഫൈനലിലെത്തി ചരിത്രം സൃഷ്ടിച്ച കഴിഞ്ഞ സീസണിലെ മികവ് ആവര്‍ത്തിക്കാനുറച്ചാണ് മുഹമ്മദ് അസ്ഹറുദ്ദീന്റെ നേതൃത്വത്തിലുള്ള കേരള ടീം പുതിയ സീസണായി തയ്യാറെടുക്കുന്നത്. 

സഞ്ജു സാംസണും സ്‌ക്വാഡിലുണ്ട്. മത്സരം ജിയോഹോട്ട് സ്റ്റാറില്‍ തത്സമയം സംപ്രേക്ഷണം ചെയ്യും. കേരളത്തെ സംബന്ധിച്ച് രഞ്ജി ട്രോഫിയിലെ ഏറ്റവും മികച്ച സീസണായിരുന്നു കഴിഞ്ഞ തവണത്തേത്. ഒറ്റ മത്സരത്തില്‍ പോലും തോല്‍വി വഴങ്ങാത്തൊരു സീസണ്‍. 

ഫൈനലില്‍ കിരീടം കൈവിട്ടെങ്കിലും ആദ്യ ഇന്നിങ്സ് ലീഡിന്റെ മികവിലായിരുന്നു വിദര്‍ഭ ജേതാക്കളായത്. കര്‍ണ്ണാടകയും പഞ്ചാബും ഹരിയാനയും മധ്യപ്രദേശും അടക്കമുള്ള കരുത്തന്മാരുടെ ഗ്രൂപ്പില്‍ നിന്നായിരുന്നു രണ്ടാം സ്ഥാനക്കാരായി കേരളം നോക്കൗട്ടിലേക്ക് മുന്നേറിയത്. രഞ്ജി ട്രോഫി എലൈറ്റ് ഗ്രൂപ്പ് ബിയിലാണ് ഇത്തവണ കേരളത്തിന്റെ സ്ഥാനം.

കഴിഞ്ഞ വര്‍ഷവുമായി താരതമ്യപ്പെടുത്തുമ്പോള്‍ കടുത്തൊരു ഗ്രൂപ്പ് തന്നെയാണ് ഇത്തവണത്തേതും. പഞ്ചാബ്, മധ്യപ്രദേശ്, കര്‍ണ്ണാടക, സൗരാഷ്ട്ര, ചണ്ഡീഗഢ്, മഹാരാഷ്ട്ര, ഗോവ എന്നിവരാണ് ഗ്രൂപ്പിലെ മറ്റ് ടീമുകള്‍. ബാറ്റിങ് - ബൌളിങ് നിരകള്‍ ഫോമിലേക്ക് ഉയര്‍ന്നാല്‍ ഇവരെയൊക്കെ മറികടക്കാനുള്ള കരുത്ത് തങ്ങള്‍ക്കുണ്ടെന്ന് കഴിഞ്ഞ സീസണില്‍ കേരള ടീം തെളിയിച്ചതാണ്. മികച്ച പ്രകടനവുമായി ടീമിന്റെ ഫൈനല്‍ പ്രവേശനത്തിന് വഴിയൊരുക്കിയ കഴിഞ്ഞ തവണത്തെ താരങ്ങള്‍ ഭൂരിഭാഗം പേരും ഇത്തവണയും ടീമിനൊപ്പമുണ്ട്.

ബാറ്റിങ് നിരയില്‍ സഞ്ജുവിന്റെ സാന്നിധ്യം ടീമിന്റെ ആത്മവിശ്വാസം വര്‍ധിപ്പിക്കുന്നു. കഴിഞ്ഞ സീസണില്‍ ഏതാനും മത്സരങ്ങളില്‍ മാത്രമാണ് താരം കളത്തിലിറങ്ങിയത്. ഇത്തവണ കൂടുതല്‍ മാച്ചുകളില്‍ സഞ്ജു ടീമിനൊപ്പം ഉണ്ടാകുമെന്ന പ്രതീക്ഷയിലാണ് ടീം മാനേജ്മെന്റ്. കഴിഞ്ഞ സീസണില്‍ ടീമിന് വേണ്ടി ഏറ്റവും കൂടുതല്‍ റണ്‍സ് നേടിയ മുഹമ്മദ് അസറുദ്ദീനാണ് ക്യാപ്റ്റന്‍. 

അസറുദ്ദീനൊപ്പം മധ്യനിരയുടെ കരുത്തായി സച്ചിന്‍ ബേബിയും സല്‍മാന്‍ നിസാറുമുണ്ട്. കെസിഎല്ലില്‍ തകര്‍പ്പന്‍ ഫോമിലായിരുന്ന രോഹന്‍ കുന്നുമ്മല്‍ ഓപ്പണറായി ടീമിലുണ്ട്. ഒപ്പം അഹ്മദ് ഇമ്രാനും വത്സല്‍ ഗോവിന്ദും അടക്കമുള്ള താരങ്ങള്‍ കൂടി ചേരുമ്പോള്‍ ഏതൊരു ടീമിനോടും കിടപിടിക്കുന്ന ബാറ്റിങ് നിരയാണ് ടീമിന്റേത്.

നിധീഷ് എംഡി, ബേസില്‍ എന്‍ പി,ഏദന്‍ ആപ്പിള്‍ ടോം തുടങ്ങിയവരാണ് ബൌളിങ് നിരയിലുള്ളത്. ഒപ്പം മറുനാടന്‍ താരങ്ങളായി ബാബ അപരാജിത്തും അങ്കിത് ശര്‍മ്മയും കൂടിയുണ്ട്. ടീമിന്റെ വൈസ് ക്യാപ്റ്റന്‍ കൂടിയാണ് ബാബ അപരാജിത്ത്. 

ആദ്യ മത്സരത്തില്‍ ശക്തരായ എതിരാളികളെ തന്നെയാണ് കേരളത്തിന് നേരിടാനുള്ളത്. മഹാരാഷ്ട്രയ്ക്കെതിരെ മികച്ച പ്രകടനം കാഴ്ച വയ്ക്കാന്‍ കഴിഞ്ഞാല്‍, പുതിയ സീസണ് ആത്മവിശ്വാസത്തോടെ തുടക്കമിടാന്‍ കേരളത്തിനാകും. അങ്കിത് ബാവ്നയാണ് മഹാരാഷ്ട്ര ടീമിന്റെ ക്യാപ്റ്റന്‍. ദേശീയ ടീമിലെ സ്ഥിര സാന്നിധ്യമായിരുന്ന പൃഥ്വി ഷായും ഋതുരാജ് ഗെയ്ക്വാദുമാണ് മഹാരാഷ്ട്രയുടെ ബാറ്റിങ് നിരയെ നയിക്കുന്നത്. 

വര്‍ഷങ്ങളായി കേരളത്തിന്റെ ഓള്‍ റൗണ്ട് കരുത്തായിരുന്ന ജലജ് സക്സേന ഇത്തവണ എതിര്‍പാളയത്തിലാണ്. ഭാവിയുടെ താരമായി വിലയിരുത്തപ്പെടുന്ന അര്‍ഷിന്‍ കുല്‍ക്കര്‍ണിയാണ് മഹാരാഷ്ട്രയുടെ മറ്റൊരു ഓള്‍ റൗണ്ടര്‍. രജനീഷ് ഗുര്‍ബാനിയും വിക്കി ഓസ്വാളുമടങ്ങുന്ന ബൌളിങ് നിരയും കരുത്തുറ്റതാണ്.