യുഎസ് ഓപ്പണ്‍: സബലെങ്ക രണ്ടാം റൗണ്ടില്‍

വാഷിങ്ടണ്‍: നിലവിലെ ചാമ്പ്യനും ലോക ഒന്നാം നമ്പര്‍ താരവുമായ ആര്യന സബലെങ്ക യുഎസ് ഓപ്പണ്‍ കിരീടം നിലനിര്‍ത്താനുള്ള പോരാട്ടം ആവേശകരമായ വിജയത്തോടെ തുടങ്ങി. ഞായറാഴ്ച നടന്ന ആദ്യ റൗണ്ടില്‍ സ്വിസ് താരം റെബേക്ക മസരോവയെ 7-5, 6-1 എന്ന സ്‌കോറിന് പരാജയപ്പെടുത്തിയാണ് സബലെങ്ക മുന്നേറിയത്.

ആദ്യ സെറ്റില്‍ മസരോവ സബലെങ്കയെ നന്നായി വെള്ളം കുടിപ്പിച്ചെങ്കിലും, പിന്നീട് ആര്‍തര്‍ ആഷെ സ്റ്റേഡിയത്തിലെ സ്വന്തം തട്ടകത്തില്‍ സബലെങ്ക താളം കണ്ടെത്തി വിജയം സ്വന്തമാക്കി. രണ്ടാം റൗണ്ടില്‍ പോളിന കുഡെര്‍മെറ്റോവയാണ് സബലെങ്കയുടെ എതിരാളി. 2014-ല്‍ സെറീന വില്യംസിന് ശേഷം തുടര്‍ച്ചയായി യുഎസ് ഓപ്പണ്‍ കിരീടം നേടുന്ന ആദ്യ വനിതയാകാനുള്ള ശ്രമത്തിലാണ് സബലെങ്ക.