'ഈ സാല കപ്പ് നംദേന'; സ്മൃതി മന്ദാനയ്ക്കും ആര്‍.സി.ബിക്കും അഭിനന്ദനങ്ങളുമായി കോലി

ബെംഗളുരു: 'ഈ സാല കപ്പ് നംദു' (ഈ വര്‍ഷം കപ്പ് നമ്മുടേത്) എന്ന മുദ്രാവാക്യം പ്രത്യാശ നിറഞ്ഞ പ്രാര്‍ത്ഥനയില്‍ നിന്ന് ആധിപത്യത്തിന്റെ ഔദ്യോഗിക പ്രഖ്യാപനമായി മാറിയിരിക്കുകയാണ്. വ്യാഴാഴ്ച രാത്രി നടന്ന 2026 വിമണ്‍സ് പ്രീമിയര്‍ ലീഗ് ഫൈനലിലെ ആവേശകരമായ വിജയത്തോടെ ഐ.പി.എല്‍, ഡബ്ല്യു.പി.എല്‍ കിരീടങ്ങള്‍ ഒരേസമയം കൈവശം വയ്ക്കുന്ന ആദ്യ ടീമായി റോയല്‍ ചലഞ്ചേഴ്‌സ് ബെംഗളൂരു മാറി.

ഈ ചരിത്ര വിജയത്തോട് ഏറെ വികാരാധീനനായാണ് ടീമിന്റെ ആവേശമായ വിരാട് കോലി പ്രതികരിച്ചത്. വിജയം ഉറപ്പിച്ചതിന് പിന്നാലെ സോഷ്യല്‍ മീഡിയയിലൂടെ താരം ടീമിനെ അഭിനന്ദിച്ചു.

'വീണ്ടും ചാമ്പ്യന്മാര്‍. ആര്‍.സി.ബിയുടെ പതാക വാനോളമുയര്‍ത്തി. നിങ്ങള്‍ ഓരോരുത്തര്‍ക്കും അഭിമാനിക്കാവുന്ന നേട്ടമാണിത്. സ്മൃതിക്കും മുഴുവന്‍ ടീമിനും മാനേജ്മെന്റിനും ഈ മഹത്തായ വിജയത്തില്‍ വലിയ അഭിനന്ദനങ്ങള്‍. നിങ്ങള്‍ ഇത് തീര്‍ച്ചയായും അര്‍ഹിക്കുന്നു. ഈ നിമിഷം ആഘോഷിക്കൂ, ആരാധകരുടെ സ്‌നേഹം ഏറ്റുവാങ്ങൂ,' അദ്ദേഹം കുറിച്ചു.

2024-ലെ ആര്‍.സി.ബിയുടെ വിമണ്‍സ് പ്രീമിയര്‍ ലീഗ് വിജയം ബെംഗളൂരു ഫ്രാഞ്ചൈസിയുടെ ദീര്‍ഘകാലത്തെ കിരീട വരള്‍ച്ചയ്ക്കാണ് അറുതി വരുത്തിയത്. ലോകമെമ്പാടും ആരാധകരുള്ള ആര്‍.സി.ബിക്ക് രണ്ട് വര്‍ഷം മുമ്പ് സ്മൃതി മന്ദാനയും സംഘവുമാണ് ആദ്യമായി ഒരു പ്രധാന കിരീടം നേടിക്കൊടുത്തത്. തൊട്ടുപിന്നാലെ 2025-ല്‍ രജത് പാട്ടിദാറിന്റെ നേതൃത്വത്തില്‍ പുരുഷ ടീമും ഐ.പി.എല്ലില്‍ കിരീടം ചൂടി. വര്‍ഷങ്ങളായുള്ള കാത്തിരിപ്പിനൊടുവില്‍ ഇന്ത്യന്‍ ഇതിഹാസ താരം വിരാട് കോലിയും അന്ന് കിരീടധാരണത്തില്‍ പങ്കാളിയായി.

വഡോദരയിലെ ബിസിഎ സ്റ്റേഡിയത്തില്‍ നടന്ന ഫൈനല്‍ വളരെ ആവേശകരമായിരുന്നു. തുടര്‍ച്ചയായ നാലാം ഫൈനലിനിറങ്ങിയ ഡല്‍ഹി ക്യാപിറ്റല്‍സ്, ജെമീമ റോഡ്രിഗസിന്റെ (57) കരുത്തില്‍ 203/4 എന്ന കൂറ്റന്‍ സ്‌കോര്‍ പടുത്തുയര്‍ത്തി. ഡബ്ല്യു.പി.എല്‍ ഫൈനല്‍ ചരിത്രത്തിലെ ഏറ്റവും ഉയര്‍ന്ന സ്‌കോറായിരുന്നു ഇത്. 

എങ്കിലും, ക്യാപ്റ്റന്‍ സ്മൃതി മന്ദാനയുടെ പോരാട്ടവീര്യം മത്സരഗതി മാറ്റിമറിച്ചു. കേവലം 41 പന്തില്‍ നിന്ന് 87 റണ്‍സാണ് സ്മൃതി അടിച്ചുകൂട്ടിയത്. ജോര്‍ജ വോളുമായി (79) ചേര്‍ന്ന് മന്ദാന പടുത്തുയര്‍ത്തിയ 165 റണ്‍സിന്റെ കൂട്ടുകെട്ട് ഡല്‍ഹി ബൗളിംഗ് നിരയെ നിഷ്പ്രഭമാക്കി. അവസാന നിമിഷം ചില വിക്കറ്റുകള്‍ നഷ്ടമായെങ്കിലും, രണ്ടു പന്തുകള്‍ ബാക്കിനില്‍ക്കെ ആര്‍.സി.ബി ലക്ഷ്യം കണ്ടു. ടൂര്‍ണമെന്റ് ചരിത്രത്തിലെ ഏറ്റവും ഉയര്‍ന്ന റണ്‍ ചേസാണിത്.

ഡബ്ല്യു.പി.എല്‍ കിരീടം വീണ്ടും നേടിയതോടെ 2025-26 കാലഘട്ടം ആര്‍.സി.ബിയുടെ സുവര്‍ണ്ണ കാലഘട്ടമായി മാറി. 18 വര്‍ഷത്തെ കാത്തിരിപ്പിനൊടുവില്‍ രജത് പാട്ടിദാറിന് കീഴില്‍ 2025 ഐ.പി.എല്‍ കിരീടം നേടിയ പുരുഷ ടീമിനൊപ്പം, ഇപ്പോള്‍ രണ്ടാം ഡബ്ല്യു.പി.എല്‍ കിരീടവും നേടിയതോടെ ഇന്ത്യയിലെ രണ്ട് പ്രമുഖ ലീഗുകളിലും ഒരേസമയം നിലവിലെ ചാമ്പ്യന്മാരായി തുടരുന്ന ആദ്യ ഫ്രാഞ്ചൈസിയായി ആര്‍.സി.ബി മാറി.

2026 സീസണിലുടനീളം ആര്‍.സി.ബി പുലര്‍ത്തിയ സ്ഥിരതയുടെ തെളിവാണ് ഈ വിജയം. ലീഗ് ഘട്ടത്തിലെ എട്ട് മത്സരങ്ങളില്‍ ആറിലും വിജയിച്ചാണ് ഫൈനല്‍ പ്രവേശനം ഉറപ്പാക്കിയത്. ടൂര്‍ണമെന്റിലുടനീളം മികച്ച ഫോമിലായിരുന്ന സ്മൃതി മന്ദാന 'ഓറഞ്ച് ക്യാപ്' സ്വന്തമാക്കുകയും ചെയ്തു. ബെംഗളൂരുവിലെ തെരുവുകള്‍ ആഘോഷത്തിമിര്‍പ്പിലാണ്. തോല്‍വികളുടെ പേരില്‍ വിമര്‍ശിച്ചവര്‍ക്ക് ഇരട്ട കിരീടനേട്ടത്തിലൂടെ ആര്‍.സി.ബി മറുപടി നല്‍കിയിരിക്കുകയാണ്.