ബ്രൂണോ ഫെര്‍ണാണ്ടസിന് ഇരട്ട ഗോള്‍; വെസ്റ്റ് ഹാമിനെ തോല്പ്പിച്ച് മാഞ്ചസ്റ്റര്‍ യുണൈറ്റഡ്

വാഷിങ്ടണ്‍: അമേരിക്കയില്‍ നടന്ന പ്രീസീസണ്‍ മത്സരത്തില്‍ മാഞ്ചസ്റ്റര്‍ യുണൈറ്റഡ് ഇന്ന് വെസ്റ്റ് ഹാമിനെ പരാജയപ്പെടുത്തി. ഒന്നിനെതിരെ രണ്ടു ഗോളുകള്‍ക്ക് ആയിരുന്നു മാഞ്ചസ്റ്റര്‍ യുണൈറ്റഡിന്റെ വിജയം. ക്യാപ്റ്റന്‍ ബ്രൂണോ ഫെര്‍ണാണ്ടസിന്റെ ഇരട്ട ഗോളുകള്‍ യുണൈറ്റഡിന് കരുത്തായി.

മത്സരം ആരംഭിച്ച് മിനുറ്റുകള്‍ക്ക് അകം തന്നെ യുണൈറ്റഡ് ലീഡ് എടുത്തു. പെനാല്‍റ്റിയില്‍ നിന്നായിരുന്നു ബ്രൂണോയുടെ ഗോള്‍. രണ്ടാം പകുതിയില്‍ 52ആം മിനുറ്റില്‍ യുണൈറ്റഡ് ലീഡ് ഇരട്ടിയാക്കി. ഇത്തവണ ബ്രൂണോയുടെ ഒരു ചിപ് ഫിനിഷ് ആണ് വെസ്റ്റ് ഹാം ഗോള്‍ കീപ്പര്‍ അരിയോളയെ കീഴ്‌പ്പെടുത്തിയത്.

63ആം മിനിറ്റില്‍ ജെറാഡ് ബോവന്റെ ഫിനിഷ് വെസ്റ്റ് ഹാമിനെ കളിയിലേക്ക് തിരികെ കൊണ്ടു വന്നെങ്കിലും പരാജയം ഒഴിവാക്കാന്‍ അവര്‍ക്ക് ആയില്ല.

മാഞ്ചസ്റ്റര്‍ യുണൈറ്റഡിന്റെ പുതിയ സൈനിംഗ് ആയ കുഞ്ഞ്യ ഇന്ന് ആദ്യ ഇലവനില്‍ ഉണ്ടായിരുന്നു. മാച്ച് ഫിറ്റ്‌നസിലേക്ക് ഇനിയും എത്താത്തതിനാല്‍ എംബ്യൂമോ ഇന്ന് കളിച്ചില്ല.