ജിമെയില്‍, ചാറ്റ്, മീറ്റ് പ്ലാറ്റ്ഫോമുകളില്‍ ജെമിനി എ.ഐ രഹസ്യമായി പ്രവര്‍ത്തിപ്പിച്ചു; ഗൂഗിളിനെതിരെ കേസ്

ഉപയോക്താക്കളുടെ സ്വകാര്യ വിവരങ്ങള്‍ രഹസ്യമായി ഉപയോഗിച്ചുവെന്നാരോപിച്ച് ഗൂഗിളിനെതിരെ കാലിഫോര്‍ണിയയിലെ ഫെഡറല്‍ കോടതിയില്‍ കേസ്. തങ്ങളുടെ അനുമതിയില്ലാതെ ഗൂഗിളിന്റെ ഉല്‍പ്പന്നങ്ങളായ ജിമെയില്‍, ചാറ്റ്, മീറ്റ് (Gmail, Chat, Meet) തുടങ്ങിയ വര്‍ക്ക്സ്‌പേസ് പ്ലാറ്റ്ഫോമുകളിലുടനീളം ജെമിനി എ.ഐ (Gemini AI) അസിസ്റ്റന്റിനെ രഹസ്യമായി പ്രവര്‍ത്തനക്ഷമമാക്കിയെന്നും, ഇത് ഉപയോക്താക്കളുടെ സ്വകാര്യ ആശയവിനിമയങ്ങള്‍ സ്‌കാന്‍ ചെയ്യാനും ചൂഷണം ചെയ്യാനും ഉപയോഗിച്ചുവെന്നുമാണ് ഹര്‍ജിയിലെ പ്രധാന ആരോപണം.
സ്വകാര്യതാ ലംഘനം

ഇമെയിലുകളും അറ്റാച്ച്‌മെന്റുകളും ഉള്‍പ്പെടെയുള്ള സ്വകാര്യ ഡാറ്റ ജെമിനി 'കൈക്കലാക്കി' എന്നും, ഇത് ഇന്‍വേഷന്‍ ഓഫ് പ്രൈവസി ആക്ടിന്റെ ലംഘനമാണെന്നും ഹര്‍ജിയില്‍ പറയുന്നു. ജെമിനി ഫീച്ചര്‍ ഓണ്‍ ചെയ്യാന്‍ ഉപയോക്താക്കള്‍ വ്യക്തമായി സമ്മതം (Opt-in) നല്‍കിയിട്ടില്ലെന്നും ബ്ലൂംബെര്‍ഗ് റിപ്പോര്‍ട്ട് ചെയ്യുന്നു.

ഈ ഫീച്ചര്‍ പ്രവര്‍ത്തനരഹിതമാക്കാന്‍ ആഴത്തിലുള്ള പ്രൈവസി സെറ്റിങ്‌സുകളിലൂടെ കടന്നുപോകേണ്ടി വരുന്നുവെന്നതും, കമ്പനി ഉപയോക്താക്കള്‍ക്ക് വേണ്ടത്ര വിവരങ്ങള്‍ നല്‍കാതെയാണ് പ്രവര്‍ത്തിച്ചതെന്നതിന്റെ തെളിവായി ഹര്‍ജിയില്‍ ചൂണ്ടിക്കാട്ടുന്നു.

ടെക് ഭീമന്‍മാര്‍ എ.ഐ (AI) സംവിധാനങ്ങള്‍ ഉപഭോക്തൃ ഉല്‍പ്പന്നങ്ങളില്‍ സംയോജിപ്പിക്കുന്നത് സംബന്ധിച്ച് നിലനില്‍ക്കുന്ന നിയമപരവും നിയന്ത്രണപരവുമായ പരിശോധനകളുടെ ഭാഗമാണ് ഈ പുതിയ കേസ്. Gmail/Workspace-ന്റെ വലിയ യൂസര്‍ ബേസ് പരിഗണിച്ച്, യു.എസ് കോടതിയില്‍ കേസ് ക്ലാസ്-ആക്ഷനായി അംഗീകരിക്കപ്പെട്ടാല്‍ നിയമനടപടികള്‍ അതിവേഗം പുരോഗമിക്കാന്‍ സാധ്യതയുണ്ട്. ഉപയോക്തൃ ഡാറ്റ കൈകാര്യം ചെയ്യുന്നതിലെ വീഴ്ചകള്‍ കാരണം ഗൂഗിള്‍ അടുത്തിടെ നിരവധി സ്വകാര്യതാ കേസുകള്‍ നേരിട്ടിരുന്നു.