ചരിത്രനേട്ടം സ്വന്തമാക്കി ഗൂഗിളിന്റെ 'വില്ലോ' ക്വാണ്ടം ചിപ്പ്

ന്യൂയോര്‍ക്ക് : സാങ്കേതികവിദ്യയുടെ ലോകത്ത് പുതിയ വിപ്ലവം സൃഷ്ടിച്ച് ഗൂഗിളിന്റെ ഏറ്റവും പുതിയ ക്വാണ്ടം ചിപ്പായ 'വില്ലോ'ചരിത്രനേട്ടം സ്വന്തമാക്കി. കമ്പനിയുടെ സിഇഒ സുന്ദര്‍ പിച്ചൈ പങ്കുവെച്ച എക്സ് പോസ്റ്റിലാണ് ഈ സുപ്രധാന പ്രഖ്യാപനം നടന്നത്. 

''ഞങ്ങളുടെ 'വില്ലോ' ചിപ്പ്, ആദ്യത്തെ പരിശോധിക്കാവുന്ന ക്വാണ്ടം നേട്ടം കൈവരിച്ചു. ലോകത്തിലെ ഏറ്റവും വേഗതയേറിയ സൂപ്പര്‍ കംപ്യൂട്ടറിലെ മികച്ച അല്‍ഗോരിതത്തേക്കാള്‍ പതിമൂവായിരം ഇരട്ടി വേഗത ഇതിനുണ്ട്,'' സുന്ദര്‍ പിച്ചൈ അറിയിച്ചു.

ക്ലാസിക്കല്‍ കമ്പ്യൂട്ടറുകള്‍ക്ക് പരിഹരിക്കാന്‍ കഴിയാത്തതോ അല്ലെങ്കില്‍ യുഗങ്ങളെടുത്തേക്കാവുന്നതോ ആയ കണക്കുകൂട്ടലുകള്‍ ഒരു ക്വാണ്ടം കമ്പ്യൂട്ടര്‍ കുറഞ്ഞ സമയം കൊണ്ട് ചെയ്തുതീര്‍ക്കുന്നതിനെയാണ് 'ക്വാണ്ടം നേട്ടം' എന്ന് വിശേഷിപ്പിക്കുന്നത്.

ഗൂഗിളിന്റെ 'വില്ലോ' ചിപ്പ് ഉപയോഗിച്ച് നടത്തിയ പരീക്ഷണം, ഏറ്റവും വേഗതയേറിയ സൂപ്പര്‍ കമ്പ്യൂട്ടറുകള്‍ക്ക് പോലും കോടിക്കണക്കിന് വര്‍ഷങ്ങള്‍ വേണ്ടിവരുന്ന ഒരു സങ്കീര്‍ണ്ണമായ ഗണിത പ്രശ്‌നം വെറും ഏതാനും മിനിറ്റുകള്‍ കൊണ്ട് പരിഹരിച്ചതായാണ് റിപ്പോര്‍ട്ട്. ഈ അല്‍ഗോരിതം 'ക്വാണ്ടം എക്കോസ്' എന്ന പേരിലാണ് അറിയപ്പെടുന്നത്.

ഈ നേട്ടത്തിന്റെ കാതല്‍, ക്വാണ്ടം കമ്പ്യൂട്ടിംഗിലെ ഒരു പ്രധാന വെല്ലുവിളിയായ ക്യൂബിറ്റുകളിലെ പിശകുകള്‍ കുറയ്ക്കാന്‍ 'വില്ലോ' ചിപ്പിന് കഴിഞ്ഞു എന്നതാണ്. ഇത് കൂടുതല്‍ വിശ്വസനീയമായ ക്വാണ്ടം കമ്പ്യൂട്ടറുകളിലേക്ക് വഴിതുറക്കും.

ഈ പുതിയ അല്‍ഗോരിതം ആറ്റങ്ങള്‍ തമ്മിലുള്ള പ്രതിപ്രവര്‍ത്തനങ്ങള്‍ പഠിക്കാന്‍ സഹായിക്കും. ഇത് മരുന്ന് ഗവേഷണം, പുതിയ വസ്തുക്കളുടെ നിര്‍മ്മാണം തുടങ്ങിയ മേഖലകളില്‍ വിപ്ലവം സൃഷ്ടിക്കാന്‍ സാധ്യതയുണ്ട്. 

ഗൂഗിളിന്റെ ഈ നേട്ടം, ക്വാണ്ടം കമ്പ്യൂട്ടിംഗ് വെറും സൈദ്ധാന്തിക ആശയം എന്നതില്‍ നിന്ന് പ്രായോഗിക തലത്തിലേക്ക് മാറുന്നു എന്നതിന്റെ വ്യക്തമായ സൂചനയാണ്. ഐബിഎം, മൈക്രോസോഫ്റ്റ് പോലുള്ള മറ്റ് കമ്പനികളുമായി ഈ രംഗത്ത് ഗൂഗിള്‍ ശക്തമായ മത്സരത്തിലാണ്.