ഉത്തര്‍പ്രദേശില്‍ നിന്ന് ഇസ്രോ റോക്കറ്റ് അധിഷ്ഠിത പേലോഡ് വിക്ഷേപണം നടത്തി

ത്രസ്റ്റ് ടെക് ഇന്ത്യ ലിമിറ്റഡുമായി സഹകരിച്ച് ഇന്ത്യന്‍ ബഹിരാകാശ ഗവേഷണ സംഘടന ശനിയാഴ്ച ഉത്തര്‍പ്രദേശില്‍ നിന്ന് ആദ്യത്തെ റോക്കറ്റ് വിക്ഷേപണം വിജയകരമായി നടത്തി,വൈകുന്നേരം 5.14 നാണ് വിക്ഷേപണം നടന്നത്, 15 കിലോഗ്രാം ഭാരമുള്ള റോക്കറ്റ് 1.1 കിലോമീറ്റര്‍ ഉയരത്തിലേക്ക് ഉയര്‍ന്ന് സുരക്ഷിതമായി നിലത്തേക്ക് താഴ്ന്നു.

'റോക്കറ്റ് 1.1 കിലോമീറ്റര്‍ ഉയരത്തിലെത്തി, താമസിയാതെ, പേലോഡ് വേര്‍പെട്ടു. ഉയരത്തുനിന്ന് ഏകദേശം അഞ്ച് മീറ്ററിലേക്ക് താഴ്ന്നപ്പോള്‍, പാരച്യൂട്ട് തുറന്നു, ഉപഗ്രഹം വിക്ഷേപിച്ച സ്ഥലത്തുതന്നെ 400 മീറ്ററിനുള്ളില്‍ ലാന്‍ഡ് ചെയ്തുവെന്ന്,' ഇസ്രോ ശാസ്ത്രജ്ഞന്‍ അഭിഷേക് സിംഗ് പറഞ്ഞു.ഡ്രോണ്‍ അധിഷ്ഠിത പരീക്ഷണങ്ങളില്‍ നിന്ന് വ്യത്യസ്തമായി, ഈ പരീക്ഷണത്തില്‍ നേരിട്ടുള്ള റോക്കറ്റ് വിക്ഷേപണമാണ് ഉള്‍പ്പെട്ടിരിക്കുന്നത്. 'മേഖലയിലും ഇന്ത്യ മുഴുവനുമുള്ള കുട്ടികളില്‍ ബഹിരാകാശ സാങ്കേതികവിദ്യയില്‍ താല്‍പ്പര്യം വളര്‍ത്തുന്നതിനാണ് ഈ പരിപാടി സംഘടിപ്പിക്കുന്നത്' എന്ന് ത്രസ്റ്റ് ടെക് ഇന്ത്യയുടെ ഡയറക്ടര്‍ വിനോദ് കുമാര്‍ പറഞ്ഞു.