വിമാനത്തില്‍നിന്ന് ഭക്ഷണപ്പൊതികള്‍ ഇടുന്നത് ഇസ്രയേല്‍ നിര്‍ത്തി

ജറുസലം: ഗാസ സിറ്റി യുദ്ധമേഖലയായി പ്രഖ്യാപിച്ചതോടെ വടക്കന്‍ ഗാസയിലേക്ക് പരിമിതിമായ തോതില്‍ അനുവദിച്ചിരുന്ന ഭക്ഷ്യസഹായ വിതരണം ഇസ്രയേല്‍ ഉടന്‍ നിര്‍ത്തിയേക്കും. ഗാസ സിറ്റിയില്‍ വിമാനങ്ങളില്‍നിന്ന് ഭക്ഷണപ്പൊതികള്‍ ഇട്ടുകൊടുക്കുന്നത് ഇന്നലെയോടെ നിര്‍ത്തി. സഹായവിതരണത്തിനായി പകല്‍ ആക്രമണം വെള്ളിയാഴ്ച വരെ നിര്‍ത്തിവച്ചിരുന്നു.

അതിനിടെ പട്ടിണിമൂലം 10 പേര്‍ കൂടി മരിച്ചു. ഇതോടെ പട്ടിണിമരണം 124 കുട്ടികളടക്കം 332 ആയി. ഭക്ഷണവിതരണകേന്ദ്രങ്ങളിലെ വെടിവയ്പുകളില്‍ 15 പേരും കൊല്ലപ്പെട്ടു. ഇതുവരെ ഗാസയില്‍ ഇസ്രയേല്‍ നടത്തിയ ആക്രമണങ്ങളില്‍ 63,371 പലസ്തീന്‍കാര്‍ കൊല്ലപ്പെട്ടു. ഗാസ സിറ്റിയില്‍നിന്നു ജനങ്ങളെ ഒഴിപ്പിക്കരുതെന്ന് റെഡ് ക്രോസ് ആവശ്യപ്പെട്ടു. പലായനം ചെയ്യുന്ന ലക്ഷങ്ങളെ പാര്‍പ്പിക്കാന്‍ സ്ഥലം കണ്ടെത്താന്‍ അസാധ്യമായ സാഹചര്യത്തിലാണിത്.