നൂറുകണക്കിന് കഴുതകളെ ഫ്രാന്‍സിലേക്ക് കയറ്റി അയച്ച് ഇസ്രയേല്‍

പാരീസ് : ഇസ്രയേല്‍ ഗാസ കീഴടക്കിയതിന് പിന്നാലെ നൂറുകണക്കിന് കഴുതകളെയാണ് ഇസ്രായേല്‍ സര്‍ക്കാര്‍ ഫ്രാന്‍സിലേക്ക് കയറ്റി അയച്ചിരിക്കുന്നത്. ഗാസയില്‍ നിന്നും പിടികൂടിയ കഴുതകളെയാണ് ഇത്തരത്തില്‍ ഫ്രാന്‍സ് ഉള്‍പ്പെടെ യൂറോപ്യന്‍ രാജ്യങ്ങളിലേക്ക് കയറ്റി അയക്കുന്നത്. അതേസമയം ഇസ്രായേല്‍ തങ്ങളുടെ കഴുതകളെ മോഷ്ടിക്കുകയാണ് എന്നാണ് ഹമാസ് ആരോപിക്കുന്നത്.

ഇസ്രയേല്‍-ഹമാസ് സംഘര്‍ഷം രൂക്ഷമായതിനു ശേഷം ഗാസയിലെ മുഴുവന്‍ ജനങ്ങളോടും പ്രദേശത്തു നിന്നും ഒഴിഞ്ഞുപോകാന്‍ ഇസ്രായേല്‍ ആവശ്യപ്പെട്ടിരുന്നു. വലിയൊരു വിഭാഗം ജനങ്ങളും ഗാസയില്‍ നിന്നും ഒഴിഞ്ഞു പോവുകയും മറ്റു രാജ്യങ്ങളിലേക്ക് കുടിയേറുകയും ചെയ്തു. ഇതോടെ പല വീടുകളിലും വളര്‍ത്തിയിരുന്ന കഴുതകള്‍ ഗാസയിലുടനീളം അനാഥരായി അലഞ്ഞു നടക്കേണ്ടി വന്നു. ഗതാഗത സൗകര്യങ്ങളുടെ കുറവും പെട്രോളിന്റെ ക്ഷാമവും മൂലം ഗാസയിലെ ജനങ്ങള്‍ ഗതാഗതസൗകര്യത്തിനും ചരക്കുകള്‍ കൊണ്ടുപോകുന്നതിനും പ്രധാനമായും ഉപയോഗിച്ചിരുന്നത് ഈ കഴുതകളെ ആയിരുന്നു.

ഗാസയുടെ നിയന്ത്രണം ഇസ്രായേലിന്റെ കൈകളില്‍ ആയതോടെ ഈ കഴുതകളുടെ രക്ഷാപ്രവര്‍ത്തനവും ഇസ്രയേല്‍ ഏറ്റെടുത്തു. നൂറുകണക്കിന് കഴുതകളെയാണ് ഇതുവരെയായി ഗാസയില്‍ നിന്നും ഇസ്രയേല്‍ സംരക്ഷണത്തിനായി യൂറോപ്യന്‍ രാജ്യങ്ങളിലേക്ക് അയച്ചിരിക്കുന്നത്. ഗാസയിലെ സംഘര്‍ഷത്തിന് അയവ് വന്നതോടെ ഹമാസ് ഭീകരര്‍ ഉള്‍പ്പെടെ തിരിച്ചുവരുന്നതായും വീടുകളുടെയും മറ്റും നിര്‍മ്മാണം ആരംഭിക്കുന്നതായും ഇസ്രയേലിന് വിവരം ലഭിച്ചിരുന്നു. നിര്‍മ്മാണ സാമഗ്രികള്‍ കഴുതപ്പുറത്ത് ചുമന്നാണ് ഇവര്‍ പലസ്ഥലങ്ങളിലേക്കും എത്തിച്ചിരുന്നത്. ഈ പ്രവൃത്തി തടയാന്‍ കൂടിയാണ് ഗാസയിലെ കഴുതകളെ ഇസ്രയേല്‍ യൂറോപ്യന്‍ രാജ്യങ്ങളിലേക്ക് അയക്കുന്നത്. എന്നാല്‍ ഇസ്രായേല്‍ തങ്ങളുടെ കഴുതകളെ മോഷ്ടിക്കുകയാണ് ചെയ്യുന്നത് എന്നാണ് ഹമാസ് അറബ് രാജ്യങ്ങള്‍ക്കു മുന്‍പില്‍ പരാതിപ്പെടുന്നത്.