Honda has won in the first endurance race

ആദ്യത്തെ എന്‍ഡുറന്‍സ് റേസില്‍ ഹോണ്ടയ്ക്കു വിജയം

ചെന്നൈ: ഇന്ത്യയിലെ പ്രഥമ എവിടി ഗോള്‍ഡ് കപ്പ് മില്യണ്‍ മോട്ടോര്‍സൈക്കിള്‍ എന്‍ഡുറന്‍സ് റേസില്‍ വിജയിച്ചുകൊണ്ട് ഹോണ്ട ടൂ വീലര്‍ 2018 മല്‍സര സീസണ് തുടക്കം കുറിച്ചു. ചെന്നൈയിലെ മദ്രാസ് മോട്ടോര്‍ റേസ് ട്രാക്കിലായിരുന്നു മല്‍സരം. ഹോണ്ട ടൂവീലേഴ്‌സും മദ്രാസ് മോട്ടോര്‍ സ്‌പോര്‍ട്ട്‌സ് ക്ലബും ചേര്‍ന്നാണ് മോട്ടോര്‍സ്‌പോര്‍ട്ടിലെ എന്‍ഡുറന്‍സ് റേസ് ഇന്ത്യയിലെത്തിച്ചത്. വാഹനത്തിന്റെയും റൈഡറുടെയും സ്ഥിരതയും ക്ഷമതയുമാണ് ഈ മോട്ടോര്‍സ്‌പോര്‍ട്ടില്‍ പരീക്ഷിക്കപ്പെടുന്നത്. 90 മിനിറ്റ് നീണ്ടു നില്‍ക്കുന്നതാണ് മല്‍സരം. എല്ലാ വിഭാഗങ്ങളും ഒരുമിച്ച് മല്‍സരത്തില്‍ പങ്കെടുക്കുന്നു. ഓരോ ടീമിനും രണ്ടു റൈഡര്‍മാരുണ്ടാകുമെങ്കിലും ഒരു സമയത്ത് ഒരാള്‍ മാത്രമായിരിക്കും മല്‍സരത്തില്‍ പങ്കെടുക്കുക. ടീമിന്റെ തന്ത്രമനുസരിച്ച് രണ്ടാമത്തെ റൈഡര്‍ മാറി കയറും. ട്രാക്കിലെത്തുന്ന ഓരോ റൈഡറും മാറും മുമ്പ് 20 മിനിറ്റെങ്കിലും മല്‍സരം പൂര്‍ത്തിയാക്കിയിരിക്കണം. ഒരു റൈഡര്‍ക്ക് തുടര്‍ച്ചയായി ഓടിക്കാവുന്ന പരമാവധി സമയം 45 മിനിറ്റാണ്.